Girona mikhualtu Real Madrid an chak

Real Madrid chuan an ke lehlamin Copa del Rey semi­final an rap tawhah a ngaih theih - Ningani zan khan quar­terfinal first leg-ah Girona chu 4-2 in an hneh. 

Santiago Bernabeu Sta­dium-a inkhelah hian Real Ma­drid captain Sergio Ramos chuan goal hnih a khung a, Lucas Vaz­quez leh Karim Benzema ten goal khat ve ve an khung ve bawk. 

Girona tan Alexander Loza­no leh Alex Granell ten goal khat ve ve an khung ve bawk a, hei hian Real an mikhual ve hun atan beiseina tlem tal a siam sak ang. 

Copa del Rey inkhel dangah Espanyol leh Real Betis an in­tawng ve bawk a, chak zawk awm loin team pahnih hi 1-1 in an inhnehtawk. 

Rin loh takin Girona-in Lozano hmangin minute sarihna lekah hmahruaina goal khung mah se Real tan Lucas Vazquez chuan minute 18-naah an si phurh a sut a, minute 42-naah Ramos hun a inherchhuak ve nghal bawk. 

Real Madrid captain hian penalty a pet lut a,  'Panenka' tia a hming an pek penalty hmangin a laiah mawi zetin a 'chip' lut - tun season-a penalty vawi sarih a khungna a ni a, heng zinga pali hi 'panenka' hmanga a pet luh a ni. 

Ramos hian panenka hmanga penalty pet a chin avang­in he tih dan 'cool' tak, player naran tana tih ngam loh hi a hmingṭhat pui hle.

Panenka penalty pet ching chhuak­tu, a hming put chhan Czech midfielder Antonin Panen­ka chuan Ramos hi tun lai player zinga panenka hmanga penalty pet thiam ber a nih thu a lo sawi tawh.

Real Madrid captain hian a panenka pet chungchang sawi zuiin, "Hun hlimawm tak a ni a, ka ngaihtuahna leh rilru pholanna remchang tak a ni," tiin a goal khung chungchang a sawi. 

Cristiano Ronaldo-a'n Juven­tus a pan hnuah Ramos hi Real tana penalty pet tu ber a ni a, tun season-ah penalty vawi sarih a pet der tawh - a career-a penalty a pet zawng zawng hi 15 a ni a, heng zinga vawi sarih hi panenka hmangin a pet vek.

Ramos chuan, "Ka pet goal zel miau avangin a nuam a, goal­keeper-ten hei hi hriaa an che sawn duh lo a nih tak leh a sir lehlamah ka pet mai a ni ang chu," a ti. 

Spain tana vawi 161 inlana goal 17 khungtu hian minute 77-naah a goal hnihna a khung leh bawk a, tun season-ah Real tan match 30-ah goal kua a khung tling leh der tawh. 

Girona-in goal hmasa ber an khung hnuah Real-in goal hnihin an chhanglet a, awlsam taka chak mai tura ngaih an nih laiin mikhual team hian minute 66-naah penalty an hmu.

Mikhual team tan Granell Nogue chuan he penalty hi goal-ah chantirin a ṭhiante tan beiseina a siamsak a, mahni muala khel leh tur an nih avangin Girona tan chuan draw result hi a tawk hle. 

Mahse, Real tan 'Cap­tain Fantastic' Ra­mos chuan he inkhela a goal hnihna a khung ve leh a, 3-2 a ni - second leg leh away goal rule mitthla chuan Real tan ngaih a ngam thei lo. 

Minute 80-naah Karim Ben­zema a inlar a, Real goal lina a khung - Girona beiseina a thaibo a, French striker tan tun season-a a goal 13-na chiah a ni. Season hmasa khan goal 12 chiah a khung a, season chanveah season hmasa a khum fel der.  

Madrid khaw club hian Pathian­ni zanah La Liga match an khel lehnghal dawn a, anmah­ni ang thoa Ningani zana Copa del Rey khel Espanyol chu khual­mualah dar 1:15 hian an lenchilh ang. 

Girona-in Real nena game hautak an khelh hnu lawkah Pathianni zan vek an inlan a ṭul dawn a, dar 8:45-ah league hma­hruaitu Barcelona an mikhual dawn - an ṭawngṭai chhan­na a nih a rinawm loh. 

Zanin La Liga inkhel turah dar 8:45 hian Atletico Madrid chuan Getafe an mikhual dawn thung a, Barcelona nen an inthlauhna point nga chiah a nih avangin tlawm a thiang lo ang.