Quarterfinal-ah Sindhu, Saina leh Srikanth

Indian badminton khel thiam pathum P V Sin­dhu, Saina Nehwal leh Kidambi Srikanth te chuan nimin khan an khing­pui ṭheuh an hneh a, harsa lutuk loin Indonesia Masters-ah quarterfinal an lut.

Seeded pahnihna Sin­­­dhu hian minute 37 chhungin tualchhung nula Gregoria Mariska Tun­jung chu 23-21, 21-7 in a hneh a, Olympic sil­ver medalist hian Spain nula chhuan­vawr Carolina Marin a hma­chhawn leh ang.

London Olympic bronze medallist Saina pawhin a thiam pariat zinga tel turin harsatna a tawk lo, kum 28 mi hian Indonesia nula Fitriani Fitriani chu 21-17, 21-15 in a hneh a, Fitriani nen an intawn tawhna vawi ngaah hnehna a chang vek. 

Kar hmasa lawka Ma­lay­sia Master quarter­final kheltu Srikanth pawhin 21-14, 21-9 in Japanese shut­tler Asian Games bronze medallist Kenta Nishimoto a hneh ve bawk. Seeded pariatna hian Asian Games champion Jonatan Christie leh All England champion Shi Yuqi te inkhela chak zawk a hmachhawn leh ang.

Singles player ṭha pathum an tlang lai hian men’s doubles pair Manu Attri leh B Sumeeth Reddy te erawh seeded pa­nga­na Kim Astrup leh Anders Skaarup te ṭang­dun lakah 14-21, 21-17, 10-21 in an chak lo thung.