Hardik Pandya & KL Rahul hremna hlip
Indian cricketer pahnih, tun hnaia hmeichhe chungchanga an ṭawngkam mawi lo tak avanga hrem tawk Hardik Pandya leh KL Rahul te hrem an nihna chu India rama cricket thuneitu sang ber BCCI chuan a hlih sak rih.
Cricketer pahnih hi India rama television show lar tak, Bollywood film siamtu lar Karan Johar-a'n a host ṭhin Koffee with Karan-ah an inlan a, hetah hian hmeichhe chungchang mawi lo takin an sawi a ni.
BCCI chuan he thil a thlen lai hian Australia-a inkhel tura zin mek an team aṭangin cricketer pahnih hi an thawn haw nghal a, ram tana khel rih lo turin hrem lailawk an nih thu an puang bawk.
Mahse, BCCI chuan nimin khan thuchhuah siamin an hnuaia cricketer chemawi lo reng reng chu BCCI Ombudsman-in an awmdan tur an ngaihtuah ṭhin thu an sawi a, mahse tun hnaiah Supreme Court lama an thubuai avangin cricket chhungkuaa an thubuai chingfel tur member an ruatte hi pawm theih an la ni lo a, cricketer pahnih hian an vanneih phah ta a ni.
Hardik Pandya hian New Zealand nena ODI series khel mek India squad a zawm ve lehnghal dawn a, KL Rahul hian England Lions laka home series khel mek England Lions a zawm mai thei bawk.
India hian tukin zing dar 7:30-ah New Zealand nen ODI series match hnihna an khel dawn a, an intawn hmasak zawkah India hian ni sa avanga DLS method an hman hnuin wicket kuain New Zealand hi an hneh a, match nga khelh turah 1-0 in hma an hruai mek.