Copa America inhmachhawn tur a chiang ta

South America khawmualpuia ram leh ram inelna Copa America chu June 14 khian khelh ṭan a ni dawn a, Brazil-a neih tur inelnaa inhma­chhawn tur te hi tihchian a ni tawh. 

Copa America group ṭhen danah mipui mit la bik sawi tur a la awm rih lo a, tun dinhmunah chuan group B-a Argentina leh Colombia inhmachhawn tur chu group stage-a ngaihven hlawh inkhel tur a ni ang. 

July 7 thleng awh tur inelnaah hian Asia khawmualpui aṭangin Japan leh Qatar an tel ve dawn bawk a, anni hi sawm bik an nih avanga he inelna hmachhawn ve tur an ni. 

South America-a football thu­nei­tu sang ber CONMEBOL chuan kum 1993 hnu lam aṭang khan an khawmualpui inelnaa tel tur hian team dang pahnih an sawm ṭhin a, hetianga an tih hma chuan an khawmualpuia ram 10 te chiahin an khel ṭhin. 

Kuminah pawh hian ṭum dang ang thoin South America pawn lam aṭangin team an sawm a, Asian team paruk an sawm zet avangin team tel hi 16 tura ruahman zet ni mah se Japan leh Qatar chiah an inlan dawn takah chuan team 12 an inel dawn a ni. 

Copa America-ah hian Mexico leh Costa Rica  chu South American team ni lo inlan ngun ber an ni a, kumin inelna hi Mexico-in 1993 hnua an khelh loh hmasak ber tur a ni a, Japan tan an vawi hnih inlanna tur a ni a, Qatar erawh Copa America an hmachhawn hmasak ber tur a ni.

Team 12 te hi group pathumah, team pali zel awmin ṭhen hran an ni a, group pathum aṭangin a sang pahnih ṭheuh bakah pathumna zinga a ti ṭha pahnihin knockout round an lut ang. 

Brazil chu inelna thlengtu an nih bawk avangin champion tura bei­sei sang ber an ni a, Chile-in Copa Ameri­­ca hnuhnung pahnihah nomawi chawi mah se tun hnaiah an tlak chhiat avangin champion tura beisei an harsa. 

Tuna zawhna awm chu Argen­tina tan Lionel Messi a kir dawn em, tih hi a ni. Argentine forward hi World Cup 2018 hnuah khan ram tan a inlan leh tawh lo a, tun hnaiah ram tan inkhelh chawlhsan a tum nia sawi a awm mek - Messi hoa an inlan phawt chuan beisei a sang ang.