Derby-ah Cole a chawl dawn

Chelsea defender hlui, tun hnai lawka season tawp thleng atana Derby County zawmtu Ashley chuan kum tawpah inkhelh chawlhsan a tum thu a sawi a, Championship club aṭangin a footballer player nun chu a thlah dawn tihna a ni. 

Kum 38  mi defender chuan, "Tun season a zawh rual hian Ashley Cole pawh a tawp ve tawh ang. Inkhelh hi nuam ka la ti reng a, mahse taksa hian a tlin reng bik lo a ni," a ti. 

Cole hian Chelsea tana a khelhpui ṭhin Frank Lampard enkawlna hnuaiah Derby-ah hian a khel dawn a, a ṭhian hlui chu a fak hle. 

Nikuma LA Galaxy chhuahsantu defender chuan, "Frankie tan a hna hmasa ber a ni tih ngaih­tuah chuan a thawk ṭha takzet a, ka tan he hmun pan tur hian ngaihtuahna sen buai a ngai lo. League hautak zet a ni tih ka hria a, Premier League kan in­hlankai theih chuan a lawmawm khawp ang," a ti.

Cole hian Arsenal-ah a career ṭanin Premier League (2) leh FA Cup (3)-ah te a champion pui a, Chelsea tan Premier Lea­gue, Champions League, Europa League, FA Cup leh League Cup-ah te a champion leh bawk.