Sala zawn hna a tawp

Cardiff City player manto ber Emiliano Sala zawn hna chu tih tawp a ni ta a, thuneitute chuan ni thum chhung an zawn hnuah pawh hnuhma engmah an hmuh loh avanga zawn hna hi titawp an nih thu a sawi. 

Emiliano Sala hian thlawhtheihna khalhtu pilot David Ibbotson nen Thawhṭanni zan khan a club thar awmna Cardiff khawpui an pan a, mahse Cardiff khawpui thleng zo loin an chanchin hi hriat zui a ni lo. 

Sala te bona bawr vela a zawngtu Guernsey Police-te chuan thlawhtheihna bo zawn hna hi tihtawp a nih tawh thu an sawi a, thuneitute chuan ni thum chhung an zawng chung pawha engmah an hmuh theih loh vang a nih thu an sawi. 

Hetihlai hian Sala unau-nu Romina chuan a unaupa chu nung dama a la awm a rin tlat thu sawiin, "Ka thinlungah hian a la dam tih ka hria a, khawngaih takin a zawn hna hi titawp suh u," tiin ngenna a siam.

Sala club hlui Nantes pawhin thuneitute chu Sala zawn hna chhunzawm turin an ngen ve bawk a, Cardiff City chuan Sala leh a pilot leh an chhungte tana ṭawngṭai chhunzawm turin mipui an sawm ve bawk.