China tan Iran an 'u' mah mah

Asian Cup khelh mek-ah Iran chuan chiang takin semifinal an lut a, Ningani zan khan sum tam vanga ngaihven hlawh thar China chu quarterfinal-ah 3-0 ngawtin an sawp.

Ningani zan quarterfinal inkhel hmasa zawkah Japan chuan 1-0 in Vietnam an hneh bawk a, a thiam pali zingah an inhlangkai - semifinal-ah Japan leh Iran hi an intawng nghal dawn a, a nghahhlelhawm hle. 

Nizan khan quarterfinal match hnih dang khelh a ni a, South Korea leh Qatar inhmachhawnin inelna thlengtu UAE leh champion lai Australia an inkhel bawk a,  he thu buatsaih a nih lai hian an result kan hre hman lo. 

Chinese Super League-ah sum a tam avangin European club liante thlengin Chinese club-ten player lei kawngah an el ngam a, Chinese player thlengin an hlawh hnem - Iran dinhmun nen chuan inthlau tak a ni. Thiamna erawh lei mai theih a ni lo tih tichiangtu erawh Ningani zana team pahnih intawng kha a ni. 

Iran-in inkhel an thunun tluan chhuak zak a, Mehdi Taremi, Sardar Azmoun leh Karim Ansa-rifard ten goal khat ṭheuh an khung a, a bik takin Azmoun a hmuhnawm fal hle - Russian club Rubin Kazan striker hian goal a khung bakah Taremi goal khung chu a siamsak a ni a, chance dang vawi thum vel a nei bawk - minute 86-naa lakchhuah a nihin ding chungah zahna lantirin fan-ten an thlah hial. 

Italian coach ropui Marcello Lippi enkawlna hnuaia khel China an la thiam tawk lo a, Iran hian an vanneih ṭum ni se goal dang tam zawk khung thei an ni - Italy tana World Cup nomawi chawi tawh Lippi hi Asian Cup zawh rualin a contract a tawp dawn a, pawhsei thlang loin a bang nghal.

Asian Cup-ah quarterfinal aṭangin video assistant referee (VAR) hman ṭan a ni a, Japan tan a ṭha zawng leh ṭha lo zawngin a thawk nghal ve ve bawk - goal pawmsak an ni lo a, penalty pek an ni thung!

Japan captain Maya Yoshida ball tauh luh chu VAR hmanga ennawn a nih hnuah a tauh luh hmain a handball hman tih hmuh a ni a, goal-ah pawm a ni lo. Minute 56-naa Ritsu Doan tih tlukin VAR rawn leh a ni a, Japan hi penalty pek niin Doan hian goal-ah a chantir.

Kum 20 mi Doan hi Ballon d'Or 2018-a rawlthar footballer ṭha hnena a vawi khat nana an pek Kopa Trophy-ah khan nominee zingah a tel a, ngaihven a la hlawh chho dawn chauh niin a lang - Ningani zanah Vietnam hian an tlarhnung an rem phui viau chungin VAR leh Doan erawh an dang zo ta lo a ni.