Chelsea-in Spurs nomawi beiseina titawp

Mauricio Pochettino leh Tottenham Hotspur nomawi beiseina chu Chelsea lakah a thamral. Ningani zan khan Stamford Bridge-ah Blues hian 2-1 in an hneh let a, aggregate-ah 2-2 ni chiahin penalty shootout-ah 4-2 in hnehna an chang.

Chelsea hian February 24, zan dar 10:00-ah Manchester City nen nomawi an inchuh dawn a, Maurizio Sarri hi Blues manager zinga League Cup final thleng thei parukna a ni a, season khatnaa ti thei palina a ni. 

Chelsea-in an player thar Gonzalo Higuaín an la chhawr thei lo a, manager Maurizio Sarri-a'n Arsenal an hneh loh zawhah a player-te chu 'fuih phur an har' thu a sawi bawk.

Amaherawhchu club ṭha Chelsea-a khel pha chin player-te'n sawisel an dawl a, insiamṭhat nan an hmang. Blues goal nawr a na nghal a, minute 27-naah N'Golo Kante hmangin hma an hruai a, 1-1 in an nihrual chiah.

French midfielder Kante hian box pawnah ball per nang fuhin kawh zetin a hlap let a; Ben Davies kap karah lutin Eric Dier-a ke sir chiahah kal lehin Moussa Sissoko leh keeper Paulo Gazzaniga kap karah a lut. A luh danah hian Spurs tlarhnung dem an awm ang a, amaherawhchu ball kal kawh dan hmu thiam chuan Kante an fak ang.

Chelsea player zinga thawm nei lian ber Eden Hazard-a'n a theihna angin a khel chhuak ṭhin lo ti mah se innghahna tlak a ni tih pholangin captain Cesar Azpilicueta cross chu goal ruak laia tak a thawlh lut a, minute 38-naa goal vang hian dinhmun ṭha zawkah an ding.

Tottenham-in Stamford Bridge an luh hmaa League Cup-a an goal khung, goal riat zinga goal ruk khungtu player pawimawh pathum Harry Kane, Dele Alli leh Son Heung-min te tel loin an khel a, first half-ah goal zawnah pawh an pet lo.

Amaherawhchu Pochettino hote hi an beidawng bik lo a, khualmualah huaisen taka nawr letin rah ṭha a thlen. Minute 50-naah substitute Danny Rose-a cross chu Fernando Llorente-a'n a tauh lut a, aggregate-ah 2-2 a ni chiah.

League Cup dan tharah away goal rule a awm lo a, extra time a awm tawh lo bawk. Goal dang a luh belh tak loh avangin penalty shootout hmangin chak zawk zawn a ni.

Spurs tan Kane, Alli leh Son te awm se an pet vek a rinawm a, an awm tak lohah chuan midang kutah mawhphurhna pek a ṭul. Tottenham tan Christian Eriksen leh Erik Lamela ten pet goal ve ve mah se Eric Dier chuan goal chungah a thlawh chhuak a, khawvel keeper manto ber  Kepa Arrizabalaga chuan Lucas Moura pet a dang.

Chelsea tana pettu Willian, César Azpilicueta, Jorginho leh David Luiz ten an pet goal vek a, Italy international midfielder Jorginho penalty pet dan mawi danglam tak leh David Luiz-a'n chakna goal a khung zawha a tlan kual nghal chu Blues ṭantute tan hmuh a nuam khawp ang.

Chelsea manager Maurizio Sarri chuan, "Minute 180 chhung kan en chuan chak phu zawk kan ni a, final thlen hi kan phu a ni. Kan khelh dan en chuan 3-1 emaw 4-1 a chak tur kan ni a, amaherawhchu second half ṭantirhah khan kan khingpuite khan kan buaina thamin an rawn khel ṭha a ni," tiin chak an phu zawk thu a sawi.

Tottenham manager Mauricio Pochettino chuan, "Hun pangngaia chak loh ai chuan penalty shootout-a chak loh ka thlang. Second half-ah kan khel ṭha a, kan khelh danah hnualna tur a awm lo. FA Cup-a Crystal Palace kan hmachhawn turah kan rilru kan pe lehnghal ang," tiin a sawi.