Midang chunga leng Djokovic

Novak Djokovic chuan nimin tlai khan Rafael Nadal 6-3, 6-2, 6-3 a hnehin a vawi sarih nan Australian Open nomawi a chawi a, world number 1 leh seeded pakhatna ni bawk Djokovic hi mipa singles player zingah Melbourne Park-a champion hnem ber a ni ta.

Kum 31 mi Djokovic hian season hmasa khan Wimbledon leh US Open nomawi a chawi kawp a, season thar hawnna Australian Open a lak leh tak avangin a zawnin major title pathum a la thei - player ṭha dang awm ve bawk mah se tun dinhmun bika a ṭha ber a ni.

Australian Open 2012 final-ah khan Djokovic leh Nadal te hi an inkhel tawh bawk a, Open Era china Grand Slam final rei ber ni turin darkar nga leh minute 53 an inkhelh hnuah Djokovic a chak; tun ṭumah erawh Serbian star hian darkar hnih leh minute li chhung lekin hnehna a chang thei.

Australia rama tennis khelmual hmingthang leh an chhuanvawr ber Rod Laver Arena, Melbourne Park-a final inkhelah Djokovic-a'n a service hmasa la nghalin, world number 2 Nadal service a chhuhsak zui bawk - a service bikah point hloh miah loin set hmasa ber a la.

Set hnihnaah 2-2 a nih hnuin Djokovic-a'n a break sak leh, Serbian tlangval hian nghet takin inkhel a thunun zui. Set thum an khelh chhunga a service hloh miah loa a kaltluan theih avangin hnehna chang turin harsatna a tawk lo.

Tennis season khat chhunga Grand Slam hmasa ber Australian Open-ah Djoko­vic hi vawi sarih final a khelhah a champion vek, he inelna bika mipa singles champion hnem ber a ni. Vawi ruk champion tawh Roy Emerson leh Roger Federer te nena record inṭawm an neih (6titles) chu a khum ta a ni.

Djokovic chuan, "Thla 12 liam ta khan zai ka ngai a, tunah chuan Grand Slam hnuhnung pali zinga pathum ka chawi thei leh ta mai hi a mak hle," tiin a sawi. Grand Slam vawi 15 champion hlim hian a elpui Nadal pawh hliam dam hlim a ni chunga a khelh ṭhat thu a sawi tel bawk.

Kum 31 mi Djokovic-a'n Grand Slam nomawi 15 a chawi ta a, a chungah hian Nadal (17 titles) leh champion hnem ber, vawi 20 nomawi chawi tawh Roger Federer te chiah an awm.

Serbian tlangval hi Nadal aiin kum khatin a naupang zawk a, player pahnih hi an intawn tawhna bikah 28-25 in a chungnung zawk. Swiss star Federer pawh kum 37 mi a ni tawh - Djokovic hian hliam nei loa a khel zel thei a nih chuan tennis player ropui bik pahnihte dinhmun ang luah ve thei turin theihna a nei.

Rafael Nadal-a'n hliam vangin Australian Open inbuat­saihna Brisbane International a khel thei lo a, inelna lian an khelh chinah erawh dan theih loh khawpin a kaltluang - set hloh miah loin final a lut thei. Mahse, Open Era chinah Grand Slam palia vawi khat aia tam champion kim thei hmasa ber nih a tumna chu a thlawn rih.

Mahse, seeded pahnihna Nadal hian Djokovic lakah bul a ṭan fuh loh hnu pawhin tho chhuak turin thahrui nei lo ang mai a ni. Court chhungah a tlan tam tawk lo a, ni danga a lak hman tura ngaih pawh a vaw let hman lo - tihsual a ngah (unforced errors 38) bawk! 

Australian Open final-ah a chak lo a, he tih lai hian Nadal hi a ral ta tihna a la ni lo. Hard court zawh hian a inkhelh thiamna clay court season an hman chhunzawm dawn a, Spanish player hi ropui takin a inlar chhuak leh ngei tura ngaih a ni. 

Naomi Osaka chuan Petra Kvitova hnehin a vawi khat nan Australian Open nomawi a chawi a, tun kara world ranking chhuak tharah chuan Simona Halep khumin  Japanese nula hi number 1 a ni nghal ang.

Inrinnni tlai khan Rod Laver Arena, Melbourne Park-ah hmeichhe singles final hi khelh niin Osaka hian championship point a hmuh hmasak pathum a hman ṭangkai loh hnuah 7-6 (7-2), 5-7, 6-4 in hnehna a chang ta tho. Chak tur hian darkar hnih leh minute 27 chhung hun a hmang a ni.

Seeded palina hian set hnihna an khelh laiin a hun ṭha hloh mah se, set hnuhnung berah erawh game khat ve ve an lak hnuah a khingpui service a chhuhsak a, ama service hunah nghet taka a din tlang theih avangin Jennifer Capriati (2001) hnuah Grand Slam hmasa ber chawi hnuah inelna lian danga champion zui thei hmasa ber a ni nghal.

Nomawi a chawi hnuah Osaka chuan, "Thu sawi hi chu ka tih mi a ni lo, ka sawi tum pawh ka theihnghilh zel. A pawimawh chu final ka khel thei hi a ni a, kei aia player ṭha leh tawnhriat ngah zawk laka a vannei zawk ka ni hi ka lawm takzet," tiin a sawi.

Kum 21 mi Osaka hian season hmasa khan Serena Williams hnehin US Open nomawi a chawi tawh bawk a, a zawnin major tournament-ah a champion. Czech Republic nula Kvitova erawhin 2016 tawp lama hliam na tak a hnuh hnuah nomawi lian a la chawi leh thei rih lo.

Nikum January thla kha chuan Osaka hi world ranking-ah 72-na a ni a, khatih hunlai khan Grand Slam bikah semifinal pawh a la thleng ngai lo. Osaka chuan, "Kei chuan a rei ka ti, season khat leka ka dinhmun inthlak hi rei lo tak angin lang mah se a awlsam lo.

"Court pawn aṭanga lo thlirtu lam pawhin a rei min tih pui ka ring, ka inkhelh leh training ka neih zawng zawng hi rei lo te chhunga liam angin ngaih theih ni mah se hun chu a duh rei ve a ni," tiin a sawi.