Player kim lo Neroca-in Aizawl FC chelh

Nimin I League inkhelah Aizawl FC chuan kim loa khel Neroca lakah hnehna an chang zo lo a, an mikhualna ramah Manipur club nen hian goal awm loin an inhnehtawk. 

Aizawl FC boss hlui Manuel Retamero-a'n 4-2-3-1 formation hmangin tlarhmaah Felix Odil Chidi a mal tlat tir a, Katsumi Yusa, Subash Singh leh Malenmganba ten hnung lamah an thlawp. 

Mizo club boss Standly Rozario-a'n 4-4-2 a hmang thung a, tlarhmaah Lalkhawpuimawia leh Leonce Dodoz an inkawp a, midfield-ah captain Alfred Jaryan, Kareem Nurain, Albert Zohmingmawia leh Rochharzela te an awm. 

Tlarhnung veng turin Hmingthanmawia, Van­lalduatsanga, Govin Singh leh Richard Kasagga te dah an ni a, si ban nghaktu chu Lalawmpuia a ni. 

Minute 12-na lekah Aizawl FC-in Neroca keeper Lalit Thapa chetsual zar an zo ṭep a, mahse kum 34 mi keeper ball pet sual chu Lalkhawpuimawia'n remchangah a hmang hman lo. 

Team pahnihin chance mumal tia sawi tur an neih theih loh hnuah mual sir lam aṭanga Shaikom Singh ball pet ṭha tak chu Op-a'n mawi takin a nam chhuak a, AFC a chhanhim. 

Mizo club tan Alfred-a'n chance a nei zawm ve zat chungin Lalit Thapa a paltlang hman lo a, Neroca tan Subash Singh-a'n Opa chiah a hmachhawn chungin a pet goal bik lo - AFC tana Kareem Nurain shot-in bar a per chu a uiawm takzet. 

Second half ṭantir minute thumna lekah defender Eduardo Ferreira hnawhchhuah a ni a, Mizo club an lawm sawt - a pawimawh ber goal erawh an hlawhchhuah phah lo a, Aizawl coach Standly-a'n Ansumana Kromah a luhtir chung pawhin goal an nei thei lo. 

Aizawl FC-in minute 42 chhung player pakhata tam zawk chungin an khel a, an chak phah lo. Mahse, Mizo club coach Standly chuan an result-ah a lawm thu a sawi.

Standly chuan, "Team ṭha tak tumin North­eastern derby kan khel a, chuti chung chuan kan khel ṭha hle. Point thum hmu thei kan ni a, mahse point khat hmuh pawh engkim ngaihtuah chuan a lawmawm a ni," a ti.

Kromah-a'n khelmual a luh rualin penalty box-ah a tlu a, mahse referee-in penalty pekna turah a ngai lo. Standly chuan, "Ka ngaihdanah chuan penalty tur a ni. Engpawhnise, vawiinah chuan point khat a ni a, nidangah a aia ṭha zawk kan beisei thei ang," tiin hma an sawn thu a sawi. 

Aizawl FC hian Zir­tawpniah Minerva Punjab nen league match an khelh chhunzawm dawn a, khual­mualah an zin ang.