Asian Cup-ah beisei loh result a thleng

Zirtawpni zan Asian Cup quarterfinal-ah beisei loh result a thleng a, South Korea leh Australia-ten UAE-ah tih tur an nei ve tawh lo!

South Korea hian rin loh takin Qatar chu 0-1 in an ngam lo a, inelna thlengtu United Arab Emirates chuan champion lai Australia chu 1-0 a hnehin semifinal an lut ve bawk.

Asian Cup semifinal hi zaninah khelh ṭan nghal a ni dawn a, Iran leh Japan chu dar 7:30-ah an inhmachhawn ang. Semifinal hnuhnung zawk erawh naktuk zanah khelh tur a ni dawn a, Qatar leh UAE an inkhel ang. 

Qatar-in World Cup 2022 thleng turin an ṭha tawk tih an pholang zel a, South Korea lakah an game plan an hlawhtlinpui - ball chang tam lo mah se counter attacking hmangin an nawr let ṭhin a, hun ṭha an nei nual. 

Qatar tan Akram Afif leh Almoez Ali ten hun ṭha an khawh­ral hnuah Abdelaziz Hatim chuan hun tawp nan minu­te 12 chauh a awm tawh tihin yard 25 vel a hla aṭangin he inkhela goal awmchhun a khung a, South Korea tan chhanletna hun a awm tawh lo. 

South Korea hian Hwang In-beom, Hwang Ui-jo, Lee Chung-yong leh Kim Jin-su te hmangin chance nei mah se an khung lo vek a, Hwang Ui-Jo goal chu video assistant referee (VAR) rawn a nih hnuah offside vangin pawm a ni lo bawk - Taeguk Warriors vanneih zan a ni lo.

UAE-in rin loh takin semi­final an lut a, second half-a Ali Mabkhout goal khung hmangin champion lai Australia an vel ṭap. 

Al Ain khawpuia inkhelah rin loh takin UAE lamin an nawr hmasa zawk a, Australia goalkeeper Mat Ryan chuan inkhel ṭantir minute 20 chhung lekin hna hautak a nei nghal - Ismail Al Hammadi pet chu vawi hnih ngawt ṭha takin a dang. 

Australia an vannei reng lo. Ali Mabkhout chuan UAE tan minute 68-naah a khung - Australia-in an si phurh an sut thei lo a, Hull City midfielder Jackson Irvine leh Al Hilal defender Milos Degenek ten an hun ṭha neih an chhawr loh chu an ui tawlh tawlh ang. 

Zanin dar 7:30-ah Iran leh Japan ten semifinal match hma­sa zawk an khel nghal dawn a, a hmuhnawm dawn tih thuah inhnialna tur a awm lo. 

Iran hi team ṭha tak an nichungin kum 1976 hnu lamah Asian Cup-ah an la champion leh ngai lo a, Japan erawh Asian Cup match hnuhnung pasarihah vawi li an champion thung. 

Iran hian tun inelnaah goal 12 an khung tawh a, Japan hian goal riat khung tawhin an lamah goal thum a lut thung - Japan tlarhnung tan Sardar Azmoun chu ven bik tur a ni ang a, goal la chhuah miah lo Iran goal su hawng turin tlarhma an thawhrim a ngai viau bawk ang.