Sala vanga mittui luang a hul thei lo

Emiliano Sala chanchin hria apiangin mittui an hru a, an awih phal lo. Argentine forward farnu Romina Sala chuan, "Thil theih loh pawh a ni thei a, mahse kei chuan an dam hi ka la ring tlat a ni. Khawngaihin khawngaih takin min zawn sak zel te u," tiin ṭap chungin ṭanpuitu a ko a, a unaupa chu thamral mai tur atan a phal lo.

Vanduaina hi a rawn thlen dawn chuan dan rual a ni lo a, goal khung dan thiam Sala pawhin thil thleng tur a hmu lawk thiam lo. Ruahman lawk dan chuan Sala hi January 21, Thawhṭanni zing lama Cardiff pan tur a ni a, amaherawhchu zan dar 7:15 ah chauh a thlawk chhuak a, a phurtu pilot pawh an thlak niin sawi a awm bawk.

Engvangin nge Sala hi engine pakhat chauh nei thlawhtheihna te 'Piper PA-46 Malibu'-ah a chuan le tih zawhna a awm nghal a, football agent Willie McKay a insawifiah. Sala-a'n Nantes aṭanga pound maktduai 15-a Cardiff a zawm theih nan McKay fapa football agent tho Mark chu sulsutu a ni a, thlawhtheihna buaipuitu erawh a fapa dang Jack a ni a, ani hi Cardiff City tan a khel mek.

Willie McKay chuan, "Thlawh­­theihna chungchangah hi chuan vawi tam Europe khaw­mualpuia player-te thlawhtir tawhtu David Henderson kan bia a, thlawhtheihna emaw pilot thlan chungchangah kan inrawlh lo. Emiliano chuanna thlawhtheihna hi kan ta a ni lo tih kan nemnghet duh bawk. Sala chhungte leh ṭhiante pawh eng vanga he thlawhtheihnaa chuang nge a nih tih ka sawifiah tawh a ni," tiin an fihlim thu a sawi.

Thlawhtheihna hi English chan­nel chung zawn vela a awm laiin biak pawh theih a ni lo a, hemi hnu hian thlawhtheihna hnu hma hmuh a ni tawh lo. Air Accidents Investigation Branch chuan thil thlen dan hi kimchang takin an zir­chiang dawn a, hetah hian an thlawh dan tura ruahman dan zawng zawng pawh zir chian vek a ni ang.

Nantes airport aṭangin a thlawk chhuak a, English chan­nel-a thliar kar te tak te te awm khawm zinga pakhat Alder­ney bul velah a tlaah ngaih a ni.

Sala leh pilot David Ibbotson te hi chin hriat loha an awm aṭangin ngawrh takin zawn a ni a, ni thum chhung an zawn hnuah thuneituten an duh tawk.

Harbourmaster Capt David Barker chuan, "Kan zawn tawh dan te uluk takin kan thlir let a, hmasawnna dang a awm kan beisei tawh loh avangin hreh tak chungin zawn chhungzawm lo turin thu kan titlu ta a ni," tiin ni thum an zawn zawhah a sawi.

Barker chuan sawi chhun­zawmin, "Kan chet dan hi Emiliano Sala chhungte chuan an duh khawp lo ang tih ka ring a, an dinhmun pawh ka hriatthiampui. Mahse hei bak chu tih theh kan nei tawh lo a ni," tiin an hlawhchham thu a sawi.

Emiliano Sala farnu Romina chuan mittui nen zawn chhunzawm turin thuneitute a ngen a, a pa Horacio Sala pawhin an chunga thil thleng chu thua sawi fiah theih a ni loh thu a sawi.

Sala chhungte hian thlawptu an nei ṭha nghal a, a club hlui Nantes pawhin, "Club leh supporter-ten Emiliano Sala hi zawn chhunzawm turin thuneitute hi na takin kan ngen. Emi i hnungah kan ding tlat e," tiin thuchhuah an siam a, club thar Cardiff City pawhin zawn chhunzawm turin an ngen.

President Mauricio Macri pawhin a foreign minister Jorge Faurie hnenah Great Britain leh France sor­kar hnenah official-a zawn chhun­zawm tura ngen turin a hrilh a. Foot­baller langsar tak tak an in­rawlh bawk. Argentina chauh ni loin football legend tiha sawi theih Lionel Messi leh Diego Maradona te pawh zawn chhun­zawm zel tura ngentu zingah an tel a, Manchester City forward Sergio Aguero pawhin hastag #NoDejenDeBuscar (A zawnna hi chawlhsan mai suh u) tiin social media kaltlangin ṭan a la ve bawk.

Ṭhenkhatin pawisa thawh theihna tur GoFundMe page an siam a, sum tawhtu zingah Nantes manager Vahid Halilhodzic, Lei­cester City winger Demarai Gray, Paris Saint-Germain mid­fielder Adrien Rabiot, Bayern Munich winger Corentin Tolis­so leh Manchester City mid­fielder Ilkay Gundogan te an tel a, hemi buatsaihtu Paris-based football agency Sport Cover chuan euro 300,000 an hmu­­chhuah theih an inbeisei a ni.

Mi ṭhahnem ngai te sum thawh­khawm zarah hian official-a zawnna chu titawp tawh mah se Inrinni aṭang khan lawng pahnihin zawn chhunzawm leh a ni.

Cardiff City ṭantute chuan an stadium kawta Fred Keenor lim bulah Sala hriat rengna turin pang­par leh thil dang hrang hrang an dah a, naktuk zana Arsenal an tlawh hunah pangar chi khat daffodils eng (yellow) chu an kawrah Sala hriat reng nan dah an tum.

Premier League thuneitute pawhin tun kar chhoa inkhel awm turah inkhelh hma apiangin Sala hriat reng nan ngawi renga din zel tur thu an tichiang tawh a ni.