Borussia Dortmund an sang zel

Bundesliga hmahruai mektu Borussia Dortmund chuan nomawi chawi an tum ngam tih an nemnghet chhunzawm. Inrinni zan khan Hannover 5-1 in an sawp a, an hnuaia awm Borussia Monchengladbach aiin point kuain a sang fal.

Dortmund tan hian Mario Gotze, Achraf Hakimi, Marco Reus, Raphael Guerreiro leh Axel Witsel ten goal khat ṭheuh an ṭhung. Goal a khung loh niah pawh Jadon Sancho a hmuhnawm chhunzawm zel - English rawlthar duh­awm hian a ṭhiante khung tur vawi hnih a siamsak leh a ni.

Kum 18 mi San­cho hian tun season Bun­desliga bikah ṭhian­te goal khung tur vawi kua ngawt a siamsak tawh bakah, goal ruk a khung tawh bawk; table hmahruaitu an nih theih nana player pawimawh leh rinrawl a tling phak.

Nizan khan champion lai Bayern Munich chuan Stuttgart an hmachhawn ve a, Nicko Kovac-a naute hian hnehna an chang thei a nih chuan Dortmund nen an inkar chu point rukah an ti tlahniam thei dawn a ni.