Nomawi pali chawi thei City

Manchester City-in FA Cup fourth round-ah Premier League club Burnley an hma­chhawn mah se harsatna an tawk lo a, 5-0 zetin Etihad Stadium-ah hnehna an chang. Inrinni zan inkhelah Gabriel Jesus (23'), Bernardo Silva (52') leh Kevin de Bruyne(61') ten goal khat ṭheuh an khung hnuah Clarets player Kevin Long chuan minute 73-naah an lamah a tilut a, Sergio Aguero chuan penalty aṭangin minute 85-naah goal ngana a khung.

Burnley manager Sean Dyche chuan, "Kan tihsual apiang min hrem a, chutihrualin Premier League lam kan ngaih pawimawh zawk avangin hnualna tur a ni lo. City hi chu inelna zawng zawnga champion turin an ṭha tawk a ni," tiin an khingpui team a fak hle. Pep Guardiola kaihhruai City hian League Cup final-ah Chelsea an hmachhawn dawn a, FA Cup bakah Champions League leh Premier League-ah te champion rinkai zinga mi an ni vek bawk.

City boss Pep Guardiola chuan, "Kan inthlawp tawn a, kan khel ṭha em em. Chutihrualin inzir belh tur erawh kan nei zel, Burnley khan ṭum hnih khat goal khung theihna tur an nei a ni," tiin tlarhnung lam siam ṭhat a ṭul thu a sawi.

Everton chuan Millwall khelmual 'The Den' an tlawh a, Richarlison (43') leh Cenk Tosun (72') hmangin ṭum hnih hma hruai mah se Millwall-in Lee Gregory (45+2') leh Jake Cooper (75') hmangin an sut a, injury time minute linaah Murray Wallace chuan Lions chakna goal khungin 3-2 in an chak.

FA Cup-ah hian VAR hman a ni a, amaherawhchu Premier League club khelmualah chauh hman a ni. Tun ṭuma MIlwall leh Toffees inkhelhna hi Championship club khelmual a ni a, Cooper--a'n a kut hmanga a an siphurh a sutna hi referee-in a hmuh tlat loh avangin Premier League club an vanduai. Everton manager Marco Silva chuan, "VAR hi inelnaa hman a nih chuan stadium ṭhenkhatah chuan ni loin a vaiah hman vek tur a ni," tiin VAR awm lo chu pawi a tih thu a sawi.

Kingsmeadow-ah AFC Wimbledon-in Kwesi Appiah minute 34-naah chuan West Ham lakah hmahruaina goal a khung a, Scott Wagstaff chuan first half tawp hma leh second half ṭantirhah a khung belh leh bawk. Hammers-in Lucas Perez (57') leh Felipe Anderson (71') hmangin chhanglet mah se League One club tan Toby Sibbick chuan minute 88-naah chak nemnghehna goal a khung. West Ham boss Manuel Pellegrini chuan, "Ka thinrim a, a zahthlak bawk. Premier League club kan nih vangin chak turah kan inngai a, mahse first half-ah chak tumin kan khel tawk lo. League One club khan keini aiin chak châkna an ngah zawk a ni," tiin a lungawi lo hle.

Frank Lampard-a enkawl Derby County-in khualmualah League One club Accrington Stanley an chai tawk hle. Wham Stadium-ah inkhel entu tam ber ṭum a ni a, Accrington player Daniel Barlaser chu minute 59-naah hnawhchhuah a ni a, Championship club tan Martyn Waghorn-a'n minute 78-naah goal awmchhun a khung. Derby defender Jayden Bogle chu injury time-ah hnawhchhuah ni mah se inkhel result a dang phah lo.

Premier League club pahnih inkhelah Watford-in Andre Gray leh Isaac Success te goal hmangin St James Park-ah Newcastle 2-0 in an hneh. Wolverhampton Wanderers erawh League One club Shrewsbury lakah goal hnih an phurh hnuah Raul Jimenez leh injury time-a Matt Doherty tauh luh hmangin 2-2 in an draw hram a, Wolves khelmualah replay khelh leh tur a ni.