India-in New Zealand an hneh nawn

India chuan New Zealand nen ODI series match nga an khelh turah match hmasa pahnihah hnehna an chang. Inrinni khan Bay Oval-ah India hian 90 runs-in mualneitu New Zealand hi an hneh a, tukin zing dar 7:30 aṭangin hmun ngaiah match thumna hi khelh chhunzawm a ni ang. 

India hi ṭhumvawrah chakin bat hmasak an thlang a, an batting ṭhatna an hmachhuan fuh hle. India opener pahnih Rohit Sharma (87) leh Shikhar Dhawan (66) ten half century siam ve vein an pahnih hian run 154 an siam hman a, an strike rate a ṭhat bawk avangin an dinhmun a ṭha nghal. Captain Virat Kohli (43), Ambati Rayudu (47) leh MS Dhoni (48) ten a mawi hnai tawk an vaw chhuak vek a, India hian wicket li chauh hlohin run 324 an vaw chhuak.

New Zealand-in an target an hre chiang a, a tir aṭanga risk lak nghal a ngaih avangin wicket pawh an hloh hma a, run 23 an siam tihin Martin Guptill chu Bhuvneshwar Kumar-a'n a vawm hlum a, a khat mawi tawkin mualneitu batsman te an thi chho a. India bowler zingah spinner Kuldeep Yadav chu che ṭha berin Kanpur tlangval hian over 10-ah run 4.5 pein wicket li a la a, New Zealand hi over 40.2-ah run 234 siamin an thi fai vek.

India hian New Zealand an tlawh hma hian Australia chu test leh ODI-ah an hneh tawh a, Virat Kohli hote hi an khel ṭha tluang hle.