United-in Emirates Stadium an luhchhuah

FA Cup sulhnu nei ṭha pahnih inkhelah Manchester United chuan Arsenal chu an mual Emirates Stadium-ah 3-1 in an hneh a, manager lailawk Ole Gunnar Solskjaer hnuaiah a zawnin match riat chhung an chak ta bawk. United hian FA Cup fifth round an lut a, nomawi an chawi thei a nih chuan Gunners nomawi chawi zat vawi 13 an tluk pha chiah ang.

Zirtawpni zan inkhelah hian Alexis Sanchez chuan inkhel bul ṭanin a club hlui Gunners ṭantuten au el mah se goal hmangin a changlet a, Jesse Lingard-a'n United goal hnihna a khung. Arsenal-in Pierre-Emerick Aubameyang hmangin beiseina thar nei mah se second half-ah substitute Anthony Martial-a'n chak nemnghehna goal a khung.

Arsenal manager Unai Emery-a'n Chelsea hneh ṭum player aṭangin Bernd Leno, Matteo Guendouzi, leh Hector Bellerin te chiah a thlak a, Bellerin hi inliam vang a ni a, Leno aia lut hi Petr Cech a nih avangin FA Cup ni mah se a siksawi lo tlukah a ngaih theih.

Soljskaer erawhin player panga ngawt a thlak a, chutih­rualin Romelu Lukaku, Alexis Sanchez, Luke Shaw, Eric Bailly leh Sergio Romero te zingah keeper tih loh chu starting eleven chuh pha an ni a, United squad chhah zia a lan rualin chak an tum tih a lang bawk.

United ṭantute ngei pawhin an sawi hnawn ṭhin Lukaku chu first half-ah player langsar ber a tih theih a, minute 21-naah Belgian striker chuan box chhungah ball fing rawlh lutin offside trap bumtu Sanchez chuan keeper Cech a bum hnuah angle zim tak aṭangin a pet lut. 

Lukaku chuan, "Pet thei dinmuna ka din loh chuan tlan tawp la, ka rawn hmu ang che. I pet goal em em ang," tiin inkhelh banah Alexis bulah training-naah a hrilh lawk thu a sawi. Goal khungna tura inrawlh player pahnih hi Mourinho hnuaiah eng ruai an ni lo a, tunah erawh an man leh hlawh phu khawpin an khel chhuak.

Minute hnih hnuah United-in counter attack hmangin an vaw let a, Ander Herrera chu bul ṭantu niin Lukaku chuan Spanish midfielder hnen aṭanga a ball hmuh chu chak takin a lakluh pui a, Jesse Lingard hnenah pe chhawngin English midfielder hian cool zetin goal-ah a khung.

United goal thumna pawh counter attack hmang thoin a ni a, Paul Pogba-a'n a ṭhat zia pholan nan hmangin thui tak a khalh hnuah goal-ah a pet a, vanglai pel tawh Petr Cech-a'n subsitute Martial tana goal khung nuam tawkin a nam per thei chauh a, French forward hian minute 82-naah United ṭantute lawmna a siam sak.

Manchester United boss Solsk­jaer chuan, "Kan counter attack khan tun hma min hriat chhuahtir a; Wayne Rooney, Cristiano Ronaldo, Ji Sung-park te khan Arsenal hmaah hetiang hian an lo ti goal tawh ṭhin. Kan rilru put hmang te, kan thawhrimna te a fakawm. A tawpah nuam sa takin chak mah ila minute 90 chhung en kha chuan kan chak dan hi a awlsam lo," tiin a player-te a fak.

Gunners-in goal a luh hma­in defender Sokratis Papas­tathopoulos chu inhliam vangin minute 21-naah thlak a ngai a, United-in goal hnih an khung zui bawk. Arsenal-in Pierre-Emerick Aubameyang hmangin minute 43-naah siphurh an sut ṭhen a, hei hian phurna pein second half ṭantirhah pawh an nawr na hle.

David de Gea aia lut United keeper Sergio Romero chuan second half-ah hnai tak aṭanga Aaron Ramsey tauh chu a nam over hman a, Argentine keeper hian save ṭha bik hi nei lo se inkhelh kalhmang a dang ngei ang. Amaherawhchu inhliam vang bawkin Laurent Koscielny chu minute 64-naah an thlak a, Gunners-in duh vang reng ni loin ṭum hnih subsitution an siam an tuar a, chak loh chhuanlam a tling. Player pahnih hi an inhliam chen tur hriat la ni lo mah se Koscielny khabe ruh hi a khi a nih chuan thla hnih hial pawh a chawlh leh a ṭul ang.

Arsenal boss Unai Emery chuan, "Kan thawk ṭha a, inhliam kan neih vangin kan kut phuarin a awm a, khelh dan hmangah duh thlan tur kan neih tlem phah hle. An phur vanglai tak kan hmachhawn avangin khelh an harsa a, chak lo mah ila kan khelh dan hrim hrimah erawh ka lawm," tiin a sawi a, Premier League lamah insawrbing a ṭul tur thu a sawi bawk.

Jose Mourinho hnuaia Manchester United kha Solskjaer hnuaiah team dang daih an ni a. An match hmasa lamah team nem an tum alawm tiin Norwegian manager dah hniam tum awm mah se North London club pahnih Tottenham Hotspur leh Arsenal te an hneh tak avangin an hlawhtlinna hi sawi hnawng theih a ni ta lo.

Solskjaer hian boruak ṭha chauh thlen loin awmze nei­in inelna hmachhawn tur a thlang a, goal khung leh venhim kawngah pawh an khelh dan thlirin vanneihna piah lam tih a lang. Chutirualin tun dinhmunah chuan Solskjaer hi manager lailawk a ni a, United manager nghet a nih chhoh a rinawm zel.