Manchester khaw club an kal zel dawn?

Zanin hian Premier League inkhel tur a awm a, champion lai Manchester City chuan zan dar 1:30 hian Newcastle United an tlawh dawn a, hemi hma minute 15-ah hian Manchester United-in Old Trafford-ah Burnley an mikhual ve bawk ang.

Pep Guardiola hote hian hnehna an chang a nih chuan Liverpool nen an inthlauhna chu point khat chauh a ni dawn a, chutihrualin Jurgen Klopp-a hote hian naktuk zan hian Leicester City an hmachhawn ve nghal dawn avangin an inthlauhna erawh a zau rei a rinawm loh.

Manchester City hian zanina Newcastle United an hmachhawn zawh hian Arsenal, Chelsea leh Schalke 04 te an khelhpui leh nghal dawn a, hmabak a hautak hle. City-in khelh tur an ngah chhan hi league bakah Champions League, FA Cup leh League Cup-a an la dam vek vang a ni.

Player hahdamtir chungchang sawiin Pep Guardiola chuan, "Inkhelh tur kan neih avangin hahdam theih an ni lo a, kan dinhmun hi pawm a ngai. Chutirhualin tuna kan dinhmun hi vanduai vang a ni lo a, vohbik kan nihna zawk a ni a, hetiang dinhmun kan thleng thei hi kan lawm em em a ni," tiin a sawi.

Spanish manager Pep chuan, "Kum 35 an nih hunah chuan hun rei tak an chawl thei ang. An chawlh tawh dawn avangin a pawina a awm lo. Kum khat pawh chawlh la rawh se. Tunah erawh chawl hman kan ni lo a, vohbik dinhmunah kan ding. Lawm takin kan pawm ang a, kan match hmachhawn apiang chak tumin kan khel ang. Eng inelna pawh hmachhawn ila, friendly match pawh ni se chak tum tur, inbuatsaih dan ṭha ber chu hnehna chang a ni," tiin a sawi.

City hi Krismas vuakveta Crystal Palace leh Leicester City laka an vanduai zawn hnuah an insiamṭha a, match riat an chak zawn leh tawh. An club hneh zingah hian an elpui Liverpool an tel a, an match hnuhnung parukah goal 28 tehmeuh an khung avangin an vanglai an hmang ṭha leh mek.

Guardiola chuan, "Newcastle United lakah hian eng team mah an him lo. Chuvangin Pathiannia Arsenal nen kan inkhel tur hi ngaihtuah hman kan la ni lo a, tuna kan khelh tur chauh hi kan rilrua awm tur chu a ni," tiin a sawi. Spanish manager hi ṭawng fimkhur viau mah se Newcastle hian Premier League-a City an hmachhawn hnuhnung 22-ah chak an nei lo a, heng zinga vawi 19 hian an chak lo.

Manchester United-in manager lailawk Ole Gunnar Solskjaer hnuaiah match riat an chak tawh a, zanina Burnley an mikhual hunah hian a vawi kuana thlentir an tum ang. United hian Thawhlehni zan Premier League inkhelah club dang zawng aiin an chak ngun a, match 48 an khelhah vawi 30 an chak.

Norwegian manager Ole Gunnar Solsjkaer chuan, "Burnley hian point thum hmuh tumin Old Trafford an rawn pan dawn. Chumi hmachhawn tur chuan kan inpeih lawk a ngai. Arsenal nen khan tlarhnung kan rem phui a, Burnley nen pawh goal venhim a pawimawh ang," tiin a sawi.

United hian Burnley lakah Premier League match hnuhnung pariatah chak loh an nei lo a, match hnuhnung pahnihah an chak bawk. Clarets hian an match hnuhnung berah Manchester City chu 5-0 in an hneh lo a, chutihrualin United boss a ṭawng fimkhur hi a awm hle. Burnley boss Sean Dyche hian Man City an hmachhawn ṭum hian league an ngaih pawimawh an ṭhat dan berin an khel lo.

Jose Mourinho hnuaiah United academy player ten khelhna hun an chang tam tawk lo a, tunah erawh a dang chho dawn niin a lang. Solskjaer chuan, "Manchester United chher chhuah ka ni a, heta ṭang hian coach hna hi ka ṭan a ni. Ka football nunah hmuh pawimawh tak he club hian a chang," tiin a sawi a, player naupang zawk khelhna hun pek a tum thu a sawi lang. United rawlthar zingah Mason Greenwood, Ethan Hamilton, Tahith Chong leh Jimmy Garner te chuan hmabak êng tak an nei a, Burnley nen erawh khelhna hun an neih kher lo ang.