Benzema-a'n Olivier Giroud a dah sang lo
Real Madrid striker Karim Benzema chuan France tana a khelhpui ṭhin Olivier Giroud chu ṭawngkam ngeiawm takin a deu a, ani chu 'Formula 1 car' a nih laiin Giroud erawh 'go-kart' (intlansiakna motor lem) mai a nih thu a sawi.
Kum 32 mi Benzema chuan, "F1 car leh go-kart chu in thliar hrang thei turah ka ngai a, he thu hi zawldawh takin ka sawi a nih hi," a ti a, Giroud nena khaikhin a duh lo.
Kum 32 mi Benzema hi kum 2015 hnuah a nungchang mawi lo avangin France tan a inlan leh tawh lo a, Giroud erawh France tan striker pawimawh niin kum 2018 World Cup nomawi an chawina match zawng zawngah khan a inlan vek.
Benzema chuan, "Kei chu Formula 1 car ka ni. Ni e, a hnathawh avangin Antoine Griezmann leh Kylian Mbappe-te an langsar ṭhin. Mahse, a game hi mi zawng zawng duh a ni em? Ka hre lo," tiin social media lama zawhna leh chhanna hun a fan-te tana a siamah a sawi.
Chelsea striker Giroud hian France tan vawi 97 inlanin goal 39 a khung tawh a, Benzema hian match 81 aṭangin goal 27 a khung thung - ram tana an thawh hlawk dan aṭanga tehnaah chuan Benzema hian Giroud a tluk lo.