India-in series la nghal

Nimin khan New Zealand leh India ten ODI match thumna an khel a, Virat Kohli hoten wicket sarihin hnehna an chang. ODI match hnih khelh tur la awm mah se Men in Blue hian 3-0 in hma an hruai tawh avangin series an la.

Bay Oval-ah ṭhum-vawrah New Zealand an chak a, bat hmasak an thlang. Ross Taylor (93) leh Tom Latham (51) ten half century an siam zarah Black Caps-in run 243 an siam a, India batting line up thlirin an target siam hi chhuanpui tham ni lo mah se chak pui theih a ni.

India opener Rohit Sharma (62) leh Shikhar Dhawan (28) ten bul an ṭan ṭha a, captain Virat Kohli-a'n run 60 siam ve bawkin Amabati Rayudu (40) leh Dinesh Karthik (38) te a tawp thlengin an dam a, ball 42 vuak tur a la awm tihin target an umpha.

ODI vawi lina hi January 31, Ningani zing dar 7:30 hian Seddon Park-ah khelh a ni dawn a, ODI vawi ngana hi Pathianniah khelh a ni ang.

India hian chanchin 

ṭha lo lam an nei ve tho a, part time bowler Ambati Rayudu chu international cricket-ah a vawm phalsak a ni rih dawn lo. Rayudu hi Australia nen January 12-a an inkhelh ṭumin a kut vai danah dik lo a awm nia ngaih a ni a, ICC lam chuan ni 14 chhungin a vawm dan chungchang insawifiah turin hun an pe a, engmah a thehlut lo.

International Cricket Council chuan, "A vawm dan hi a dik thlap tih endik a nih hma chu hremna hi kal pui a ni ang," tiin thuchhuah an siam.