Ni li chhungin Spurs nomawi beiseina a tawp

Selhurst Park-ah Crystal Palace-in an mikhual Tottenham Hotspur chungah zahngaihna an lantir lo a, 2-0 in an hneh. Mauricio Pochettino hote hian League Cup beiseina Chelsea laka a thamral  aṭanga ni linaah Palace lakah an tlawm zui avangin tun season-a Spurs nomawi beiseina chu a tawpah a ngaih theih.

Palace hian Connor Wickham hmangin minute 9-naah hma an hruai a, Kyle Walker-Peters-a'n ṭul lo taka a kuta ball a khawih avangin penalty a chawi a, Spurs midfielder hlui Andros Townsend-a'n goal hnihna a khung. Tottenham-in second half-ah nawr let mah se an penalty hmuh chu Kieran Trippier-a'n goal zawnah a pet lo a, an tho chhuak lo.

Tottenham-in stadium thar sa chungin season ṭha tak an hmang a, player thar langsar lalut lo mah se league-ah champion thei zinga mi an ni. Inelna dang League Cup, FA Cup leh Champions League-ah pawh an dam vek a, Pochettino hnuaiah nomawi an chawi ve dawn niin a lang.

Amaherawhchu Manchester United an hneh loh ṭum aṭangin an chungah vanduainain thla a zar a, league-ah Fulham hneh hram mah se ni li chhung lekin League Cup leh FA Cup-ah tla. United an hneh loh ṭum hian goal chance ṭhahnem tak an hlah a, buaina belhchhah turin inkhel tawp hma hretin goal khung khawl Harry Kane a inhliam a, he inkhelah tho hian Moussa Sissoko chu a inhliam bawk.

South Korea forward Son Heung-min chuan  Asian Cup khel turin UAE lam a pan san a, Fulham nen Delle Alli a inhliam zui a. Inkhelh pawimawh vang lai takin an player pawimawh an chhawr thei lo a, an champion theihna tura ngaih League Cup leh FA Cup beiseina a tawp takah chuan Champions League lam an thlir a ṭul dawn. Amaherawhchu he inelna erawh Europe club lian te pual a nih avangin Spurs tan chuan hmun a awm loah a ngaih theih thung.

Tottenham manager Mauricio Pochettino chuan, "Kan club hi kan che ṭha em em a, kan  hlawhtling takzet. Season hnuhnung panga chhung kan thlir chuan kan tum chu nomawi lam ni loin hmachhawp dang a ni; chu chu Chelsea, United, City, Arsenal emaw Liverpool te el phak a ni. Mipui erawhin nomawi la turin min duh a, amaherawhchu a tak tak kan thlir chuan tun dinhmunah chuan nomawi lak hi kan tum ber a la ni lo," tiin club chhung tih chak a pawimawh thu a sawi.

Pochettino chuan sawi chhunzawmin, "Tun season hi season harsa tak a ni a, kan tan chuan champion elphak ringawt pawh hi a harsa a ni. A sang pali zinga awm phak hi tuna kan tum ber chu a ni a, Manchester City leh Liverpool inkar tih tlem kan tum bawk. Champions League-ah erawh Dortmund hneh a, round thar thlen kan tum ang," tiin nomawi chungchang a sawi ngam lo.

Spurs hian naktuk zan hian Wembley Stadim-ah Watford an hmachhawn ang a, Crystal Palace-in Southampton an hmachhawn thung ang.