Qatar leh UAE boruak a 'hot'

Asian Cup semifinal match hnihna chu zanin dar 7:30 hian khelh a ni dawn a, rin loh taka a sang pali zinga tel pahnih UAE leh Qatar an inkhel dawn. 

Team pahnih hi team ṭha tak ni si, Asian football powerhouse zinga chhiar tel ni ngai lo an ni a, hei vang tak hian an inkhel boruak a sang dawn - zaninah an ram thawnthu ziah danglam an tum ang. 

Qatar hian goal 12 khung tawhin an lamah a la lut miah lo a, he team hi an ṭha tih phat rual a ni lo - UAE tlarhmain hna an ngah dawn a, tlarhnung an bang bik lo tihna a ni. 

UAE tan tlarhmaah Ali Mabkhout a ṭangkai dawn tihna a ni. Kum 28 mi forward hian tun inelnaah goal li a khung tawh a, ani hi kum li liam taa Asian Cup top scorer kha a ni - a goal khung thiam a la theihnghilh lo. 

Mabkhout hi a club khelhna Al Jazira khelmual Mohammed bin Zayed Stadium-a inkhel tur a nih avangin a tlangnel sa lehnghal dawn a, Qatar tlarhnung tan ven bik a fuh ang - 2015 Asian Cup-a 4-1 a Qatar an sawp khan Mabkhout hian goal hnih a khung. 

Qatar hian tlarhmaah goal sarih khung tawh Almoez Ali an neih avangin an lungphang lo ang tih a chiang a, Ali hian goal khat chiah a khung leh a nih pawhin Asian Cup tournament pakhata goal khung hnem ber record Iran legend Ali Daei-a siam chu a nihrual ang. 

Almoez Ali vanneihna chu goal khung tur 'supply' tu lam a nei ṭha hi a ni - Al Annabi leh Akram Afif te chuan assist panga ve ve an nei tawh a, UAE tana buaina thlen turin an ṭha tawk.