Spain-ah Alvaro Morata a kir

Chelsea striker Alvaro Morata chu football nun bul a ṭanna Spain-ah a kir leh ta. Spanish striker hian thla 18 chhung khel turin Atletico Madrid chu loan hmangin a zawm - nimin khan medical test a paltlang tawh a, he thu i chhiar lai chuan inremna an ziak fel tawh ang.

Real Madrid striker hlui hian 2017 khan a hun laia Chelsea player manto ber ni turin London club hi a zawm a, Blues tan inelna hrang hrangah match 72 a khelh aṭangin goal 24 a khung sak hman - tun season erawh beisei a phak lo; Premier League bikah phei chuan goal nga bak a la khung lo.

Chelsea hian Juventus striker Gonzalo Higuain an lakluh tawh avangin Morata hi an chhuah zui a, Maurizio Sarri-a'n Napoli a enkawl laia a chawr tawh Higuain leh France international Olivier Giroud te chhawr tur a la nei dawn tihna a ni.

Kum 26 mi Morata chuan, "He hun lo thleng tur hi ka nghakhlel hle, hun kal tawh chu thlakthleng theih a ni tawh lo. He club tana ka khel thei tur hi ka lawm," a ti. Morata hi a naupan lai chuan Atletico player a ni a, mahse senior career bul a ṭanna erawh Real Madrid a ni thung.

A hun tawn tawh chungchang sawi zuiin Morata chuan, "A nihna takah chuan Atletico hi ka bul ṭanna a ni, thil engkim fel tawh se, training neih hlan ka nghakhlel tawh hle. He hmuna awmte hian min hrechiang a, kei pawhin an hlutna ka hre ve bawk," a ti.

La Liga season kal laiah Atletico Madrid hi pahnihna an ni mek a, champion lai leh hmahruaitu ni bawk Barcelona nen an inthlauhna chu point nga a ni. Striker Diego Costa chu hliam vangin an chhawr thei lo mek a, Morata an neih belh tak hnuah Portugal winger Gelson Martins chu Ligue 1 club AS Monaco-ah tun season chhung cham turin loan hmang thoin an chhuahtir ve thung a ni.