Barca leh Real an chak - Messi a vul zel

La Liga chung berah Bar­ce­lona-in an dinhmun an sawhnghet zel a, Pathianni zan khan an mikhualna ramah Girona chu 2-0 in an hneh. 

Barca tan Lionel Messi chuan goal khat a khung a, Argentine forward-in tun season-a goal 26 a khungna a ni leh der tawh - goal 40 vel chuan season a khar leh ngei dawn niin a lang. 

Real Madrid-in Champions League khelh an tumna kawngah an dinhmun an sawhnghet ve zel bawk a, an mikhualna ramah Espanyol chu 4-2 in an hneh. 

European champion tan Karim Benzema chuan goal hnih a khung a, Sergio Ramos leh Gareth Bale ten goal khat ve ve an khung bawk. Raphael Varane erawh hnawhchhuah a ni thung. 

Barcelona-in Girona lakah goal hmahruai khung turin an nghah rei a ngai lo. Nelson Seme­do chuan minute kuana lekah goal hmahruai a khung a, Messi chuan minute 68-naah mawi zetin a chhunzawm ve bawk.

Catalan club-in goal tam zawk khung thei an ni a, mahse Girona keeper Bono chuan Messi leh Luis Suarez te hun ṭha neih a dan sak a, an mualpho lutuk tur a venghim.

Hetihrual hian Girona hian hun ṭha nei lo tawp an ni bik lo a, an striker chhuanvawr Cristhian Stuani chuan hun ṭha vawi thum ngawt nei mah se Germany international goalkeeper Marc-Andre ter Stegen a paltlang thei lo. 

Barcelona hian Nilaini zanah Copa del Rey quarterfinal second leg an khel lehnghal dawn a, first leg-ah Sevilla chu 0-2 a an ngam loh tawh avangin an hmabak a hautak hle. 

Lionel Messi-a'n September hnu lama league match a khelh zawng zawngah goal a khung loh pawhin assist tal a nei ziah - tun season-ah league match 19-ah goal 19 a khung a, inelna hrang hrangah goal 26 a khung tawh. 

Barcelona legend hi An­toine Griezmann nen La Liga season hnuhnung pasariha goal 10 aia tlem lo khung ziah thei awmchhun an ni - mahse season sarih aṭanga khaikhinin Griez­mann hian a la phak lo hle. 

La Liga season hnuhnung pasariha Messi-a'n goal a khung tlem ber ṭumin league goal 26 a nei a, Griezmann hian league goal a khung hnem ber ṭumin goal 22 a khung - a chet ṭhat ber laiin Messi chet chhiat ber season a phak lo. 

Griezmann hian Inrinni zan khan Getafe lakah Atletico chu 2-0 in hnehna a chanpui a, goal khat a khung - tun season-ah league match 21 khelin goal 10 a khungna a ni a, inelna hrang hrangah goal 16 a khung tawh. 

Real Madrid tan Karim Benzema chuan minute lina lekah goal hmahruai a khung a, defender goal khung thei Sergio Ramos chuan minute 15-naah a chhunzawm ve leh bawk.

Espanyol tan Leo Baptistao chuan minute 25-naah si phurh rawn sut ṭhenin beiseina rawn siam ve lehnghal mah se an beiseina erawh a chuai hma hle - Benzema chuan first half hun pek belhah a khung leh a, chawlh­lawk an hman meuh chuan 3-1 in Real-in hma an hruai. 

Kar thum zet hliam vanga a chawlh hnuah Gareth Bale chu minute 64-naah luhtir a ni a, Welsh forward hian khelmualah minute thum lek hun a hmang hman tihin goal a khung nghal a, a dam tawh tih a pholang. 

Minute 72-naah Raphael Varane chu red card pek niin hnawh­chhuah a ni a, mahse French defender hnawhchhuah a nih meuh hi chuan goal li an khung tawh - tam zawk an nih hnuah Espanyol tan Roberto Rosales chuan si phurh a sut ṭhen a, awmzia erawh a nei phak tawh lo.