Padma Shri dawngtu Chhetri

Indian footballer ro­pui ber pawla chhal ngam Sunil Chhetri chu Repub­lic day khan India rama chawimawina sang Padma Shri hlan a ni a, footballer zinga he chawimawina dawng thei parukna a ni. 

Kum 34 mi Chhetri hian India tan match 107 khelin goal 67 a khung tawh a, Blue Tigers tana goal khung hnem ber record a chelh mek. Chhe­­tri hian ram tan Nehru Cups (2007, 2009, 2012), AFC Challenge Cup (2012) leh SAFF Championships (2011, 2016) nomawi a chawi tawh a, Asian Cup-ah vawi hnih a inhlan­kaipui tawh bawk. 

AIFF Player of the Year-a vawi nga thlan ni tawh Chhetri hian Dem­­po leh Churchill Brothers chu I League nomawi a chawipui tawh a, Bengaluru tan I-League (2), Federation Cup (2) leh Super Cup-ah cham­pion tawhin kum 2016 khan AFC Cup final a hruai thleng. 

August 2018-a Asian Football Confederation (AFC)-in Asian Icon-a an puan striker hmaa Padma Shri dawng tawh footballer-te pawh hi an hrawl hlawm hle. 

Padma Shri dawng tawh footballer te;Chuni Goswami hi a vanglaia Tottenham Hotspur-in an rim, Asian Games 1962-a India-in gold an lak ṭuma captain leh Asian Cup 1964-a India pahnihna nihpuitu a ni. 

PK Banerjee hi FIFA chawimawina sang ber FIFA Order of Merit danwg­tu a ni a, Asian Games-ah gold la tawhin 1960 Summer Olympics-ah khan Indian football team tan captain a ni a, France nen 1-1 a an inhnehtawk ṭumin India tana goal khungtu a ni. 

Sailen Manna hi Eng­lish FA-in 1953-a khawvela captain ṭha zual 10 a thlan chhuah zingah a tel phak a, Asian player tel chhun a ni. Kum 1951 Asian Games-ah Indian football team chu gold a lakpui.

Gostha Pal hi Indian football tana hmahruaitu pawimawh a ni a, Indian national team captain hmasa ber niin 1920 -1930 chhung khan India captain dinhmun hi a luah.

Bhaichung Bhutia chanchin hrilh nawn kan ngai lo. Sikkimese striker hi Indian footballer-ah chuan lar ber ang hiala chhal ngam a ni. Kum 2014 khan Asian Football Hall of Fame-ah lakluh a ni a, International Federation of Football History & Statistics-in kum 2016-a  '48 Football Legend Players' tih a puanchhuahah a tel.