Bayern-in Dortmund um zel

Germany champion Bayern Munich chuan Bo­russia Dortmund lakah an nomawi kawl lai chan mai an tum bik lo. Pathianni zan khan Bayern hian VfB Stuttgart 4-1 a sawpin hmahruaitu an phak lohna chu point ruk a ni mek.

Allianz Arena-a in­khel­ah Bayern-in minute ngana lekah Thiago Alcantara hmangin hma an hruai. Mikhual lamin forward Anastasios Donis hmangin sut ve mah se, Bundesliga champion hian Christian Gentner (own goal), Leon Goretzka leh Robert Lewandowski te hmangin an chhang let.

Poland international Lewandowski-a'n pe­nalty vawi 24 a chhuih zinga a hlahna hmasa ber ni turin khung lo mah se, a hun ṭha hnuhnung erawh a hlah nawn lo - season kal laiah league goal 12 a khung tawh.

A zawna season li champion tawh Bayern manager Niko Kovac chuan, "A tir lamah duh­thusamin khel lo mah ila, inkhel chawhnu lamah kha chuan Stuttgart tlarhnung sut hawn dan tur kan hre thei tawh a ni. Hun ṭha kan insiam hnem theih dan ngaihtuah kha chuan hnehna chan hi ka phu a ni," tiin a sawi.