Juventus chakna Ronaldo penalty

Hun tawp hma minute hnih chauh a awm tawh tiha Cristiano Ronaldo penalty chhuih luh hmangin Juventus chuan Lazio 2-1 in an hneh a, Massimiliano Allegri naute hian pahnihna Napoli lakah point 11 ngawtin hma an hruai fal ta.

Pathianni zan Stadio Olim­pico-a inkhelah Juventus midfiel­der Emre Can-a'n minute 59-naah anmahni lamah a ti lut a, minute 74-ah substitute Joao Cancelo hmangin an sut hlauh - goal dang erawh hmuh zui mai tur a awm lo.

Team pahnihin point an insem dawn nia a lan hnuah Napoli midfielder Senad Lulic chuan box chhungah Joao Cancelo a tihtluk avangin penalty a chawi a, Portuguese international forward Ronaldo-a'n tun season chhunga a goal 17-na khung nan a hmang.

Inrinni zan khan pahnihna Napoli chu AC Milan nen goal lut loin an inhnehtawk tawh a, hei vang hian Turin club hian a zawna a season riat nan Serie A nomawi chawi an beiseina a sang tawh hle.

Allegri naute hi league-ah chauh ni loin inelna dangah pawh an cheṭha, Nilaini zan hian Atalanta nen Coppa Italia quarterfinal an khel dawn a, inelna sang Champions League-ah last 16 an lut tawh bawk; February 21 hian Atletico Madrid nen an intawng dawn a ni.

Hnehna chnag mah se Juventus manager Massimiliano Allegri chuan an tan inkhel hautak leh harsa tak a nih thu a sawi. Bianconeri hian goal khung tumin an khingpui goal-ah vawi thum an pet zinga pahnih an lut hlauh a ni.

Italian manager Allegri chuan, "Emre Can kha defender hma chiaha awm turin ka ti a, mahse a khelh thiamna hmun a ni lo. Tihsual a ngah a, hun harsa tak ka siamsak a ni ringawt, ka tihsual a ni," tiin a player chu a khelh thiam tawk lohna hmuna a dah chungchangah mawhphurtu a nih thu a sawi.

Kum 51 mi Allegri chuan sawi zawmin, "Ciro Immobile khan a hun ṭha kha hmang ṭangkai se chuan 2-0 in hma an hruai thei dawn, an vanduai rualin kan vannei ve bawk. Hun tawp lam minute 30 chhung kha chuan kan khel ṭha zawk thung.

"Napoli an chak lo tih hre sain kan khel a, ka naute kha inkhel harsa tak hmachhawn pawh ni ila point thum hmu thei kan nih zia ka hrilh lawk vek a ni. A khaikhawm nan chuan Rome-a Lazio hneh hi result ṭha a ni," tiin a sawi.