Higuain bul ṭan zanah Chelsea chak Chhuah diltu Hudson-Odoi-a'n goal a khung

Chelsea-in League Cup final an thlen hnuah FA Cup fourth round-ah Sheffield Wednesday chu 3-0 in an hneh a, Callum Hudson-Odoi chuan chhuah dilna a thehluh aṭanga darkar 24 hnuah goal a khung. Blues tan hian Willian-a'n goal hnih khungin hemi karah hian Hudson-Odoi-a'n goal mawi bik a pet lut a, player thar Gonzalo Higuain-a'n bul a ṭan bawk.

Football a nunrawng an ti a, VAR pawh a nunrawng tho. Pathainni zan Stamford Bridge-a inkhelah hian VAR hman a ni a, Sheffield penalty thlutlukna sut sak an nih hnuah Blues penalty erawh kaltlung pui a ni. Thutlukna dik tak ni mah se a tuartu Championship club tan erawh hriatthiam a har khawp ang.

Minute 22-na lekah Blues defender Ethan Ampadu chuan Sheffield midfielder Joey Pelupessy a tihtluk vangin penalty a chawi a, amaherawhchu VAR hmanga thil thleng an en let chuan Ampadu hian ball a pet hmasak avangin thutlukna an sut. Championship club an vanduai zui a, Sam Hutchinson a chet tlai hret avangin Chelsea wing back Cesar Azpilicueta chu tlawh fuh hman a, goal hlauhawm ni lo mah se foul ngei a nih bakah penalty area chhunga thil thleng a nih avangin penalty an chawi.

Chelsea assistant manager Gianfranco Zola chuan, "Penalty pet tur chu Higuain a ni a, hetiang hi a thlen chang a awm. An pahnih an inrawn hnuah Willian-a'n mawhphurhna a la a, chetdan mawi tak a ni," tiin penalty pet dawna thil thleng chungchang a sawi. Brazilian winger Willian chuan cool takin penalty hi a khung a, first half-ah 1-0 a ni.

Second half-ah Hudson-Odoi thiam zia a lang a, minute 64-naah English winger hian Andreas Christensen hnen aṭanga a ball hmuh chu box chungah la thlain a petna tur khawp a insiam turin a kheng let nghal a, goal ṭha bik a khung.

German club lian Bayern Munich-in pound maktaduai 35 laia lak an duh chhan chu a chiang a, Chelsea lamin chan mai an tum lo. Blues ṭantute chuan, "Cham hram rawh" tiin cham tura an duh thu an chham rual nghal a, assistant coach Zola chuan, "Keini pawhin kan bula awm turin kan duh a, mipui hi kan zawm ve a ni. Europe ram hrang hranga club lian hi thlir ula, keini anga Under 18 player ṭha hi an nei chuang lo. Hei hian kan ring tawk tih a lang a, kan tan a la pawimawh hi kan ring tlat," tiin a sawi.

Zola chuan sawi chhunzawmin, "A khelh dan kha thlir ula, ti ṭha duh lo chu a ni lo. Training-naah pawh ropui tak a khung," tiin a sawi belh. Chelsea hian chelh ngei tumin kar khatah  £80,000 hlawhtir an tum a, amaherawhchu thla 18 chiah contract nei tawh Hudson-Odoi hian hun tam zawk inkhelh a duh a, engmah chiang a la awm lo.

Chelsea-in dinhmun siam ṭhat nan VAR mamawh mah se an chak chhan tak erawh a ni lo. Minute 83-naah Willian chuan Blues goal thumna a khung a, Sheffield tan thawhchhuah ngaihna a awm tawh lo.

Chelsea assistant boss Gianfranco Zola chuan, "Kan result a ṭha a, kan lawm. Knockout hi a harsa ṭhin a, Spurs nen khan kan khel ṭha em em a, tun ṭumah pawh a tira insiamṭhat nan hun kan mamawh hret tih loh kha chu kan ṭha hle," tiin chak an phu thu a sawi.

Higuain chungchang sawiin Zola chuan, "Gonzalo Higuain khelh danin minti lawm hle. Hmun awl insiam a tum a, ball hmuh tumin ṭan a la nasa hle. Amaherawhchu vengtu a ngah avangin a tan a awlsam lo a ni," tiin a sawi.

Zanin dar 1:15 hian fifth round draw neih tur a ni a, club lian an tam tawh lo. Big six aṭangin pathum Manchester City, Manchester United leh champion lai Chelsea te an la dam a, Premier League club zingah Wolverhampton Wanderers, Brighton & Hove Albion, Watford leh Crystal Palace te an la awm. Wolves leh Brighton te erawh-in last 16 lut turin replay an khelh a la ngai thung.

Fifth-round hi February 15-18 inkarah khelh tur a ni a, League One club pahnih AFC Wimbledon leh Doncaster Rovers te an la awm a, tum châkawm zinga mi an ni ang.