Indonesia Masters champion Saina

India nula badminton khel thiam Saina Nehwal chuan Carolina Marin hnehin Indonesia Masters nomawi a chawi. Pathian-nia final khelhah game hmasa bera Saina-i'n 4-10 in hma a hruai laiin a khingpui Olympic champion lai hi a khup hliam vangin a khel zui thei lo.

London Olympic bronze medalist Saina hian Badminton World Federation hnuaia nomawi a chawi hnuhnung ber chu 2017 Malaysia Masters kha a ni a, season hmasa khan beisei phak lo mah se kuminah erawh bul a ṭan fuh hle.

Kum 28 mi Saina chuan, "Tun hnai kum hnih chhung vel chu hliam vangin ka buai ngun hle, tun season erawh chu beisei pawh a sang ve leh ta khawp mai. Keimah chauh ni loin Indian shuttler dangte pawhin kum ṭha an hman ngei ka beisei," tiin a sawi.

Mipa inelna lamah Danish player Anders Antonsen chuan world number 1 Kento Momota chu darkar khat leh minute 19 chhungin 21-16, 14-21, 21-16 a hnehin a vawi khat nan Indonesia Masters title a la ve bawk.

Kum 21 mi Antonsen chuan, "Kum ruk mi chauh ka nih laiin badminton ka khel ṭan a, tunah chuan ka bul ṭantirh lama ka duhthusam ni ṭhin pakhat kha a thleng dik ta," tiin a sawi.

Singles champion hian lawmman atan Rs 18,67,556 an dawn bakah, BWF ranking point 9,200 an hmuh belh bawk a ni.