Arsenal leh Ivan Perisic inhnaih?

Thlasik football bazar a tawp hnai a, thuthang lengvak a tam hle. Arsenal leh Ivan Perisic chu an inhnaih hle niin khawthlang media te chuan an tarlang a, Italian chanchinbu lian pakhat Libero phei chuan an inrem fel tawh niin a tarlang.

Croatia international Perisic hian September 2017 khan Italian club tan hian 2022 thleng daih contract a ziak. Mahse, Wolfsburg player hlui hian tun hnaiah San Siro aṭanga chhuah dilna a tehlut.

Inter Milan director Giuseppe Marotta chuan, "Player zingah chhuah dil an awm, Perisic pawhin a duhna a lantir. Club tana a hlutna te nena chhutin, a duhthlanna kan zah sak turah ka ngai," a ti. An player hi a man phu tawk anga chhuahtirna tur an hria a nih chuan chelh an tum lo niin a lang.

Arsenal hian kum 29 mi Perisic hi lakluh an duh ngei tih chu a chiang. Mahse, manager Unai Emery-a'n tun bazar hun bikah a ngheta player an lak theih loh tur thu a sawi tawh, Inter winger hi an la dawn a nih pawhin season tawp thleng daih loan hmangin a ni anga, season tawpah pound maktaduai 35 bawrin an la nghet ang.

Italian club tan inelna hrang hranga match 142 a khelh aṭanga goal 34 khungtu hian tun season chhung bikin match 25 a khel tawh a, goal thum a khung sak bawk. Borussia Dortmund player hlui hian duhthusam in season hmang ṭha lo mah se a theihna a sang a, man tlawm taka lak theih a la ni lo.

Jose Mourinho awm laiin Manchester United khan lakluh tumin an lo dawr tawh, 2017 kha chuan Inter hian pound maktaduai 50 an phut - tunah erawh a hlutna a tlahniam deuh tawh tura ngaih a ni thung.

Emery enkawlna hnuaiah Mesut Ozil a tlatlum tawk lo a, Germany international hlui hi hliam vanga buai chang nei mah se a dam pawhin a chhawr meuh lo. Season tawp rualin ball thiam Aaron Ramsey a chhuak dawn bawk - tlarhma lam pui tur player chu an mamawh hle.

Hliam vangin Hector Bellerin, Danny Welbeck leh Rob Holding te tun season chhung an chhawr thei tawh dawn lo; Henrikh Mkhitaryan leh Sokratis Papastathopoulos te an hliam mek bawk.

Squad thuam chhah nan Perisic bakah Barcelona midfielder Denis Suarez leh Paris St-German player Christopher Nkunku te chu an ngaihven mek bawk a, an duhzawng la lut tur hian Janaury 31, Ningani zan thleng hun an la nei.

Season chanve an hman mek laiin Arsenal hi an talbuai a, season thara Champions League khel phak tur pawhin intuai thar an mamawh hle. Zanin dar 1:15 hian Cardiff City an mikhual dawn, FA Cup aṭanga tla hlim hian an match lehpekah Manchester City an hmachhawn zui dawn bawk avangin insiamremna hun ṭha a ni ang.