United hmachhawn lo tur Neymar?

Paris St-Germain manager Thomas Tuchel chuan Manchester United hmachhawn tura Neymar buatsaih chu thil harsa bik a nih tur thu a sawi.

Brazil forward hi kar liam ta Nilaini khan French Cup-a Strasbourg an hmachhawn ṭumin a ke phahah hliam a tuar a, minute 62-naah lakchhuah a ni. 

PSG boss Thomas Tuchel chuan, "Dam hman tura Neymar buatsaih hi a harsa takzet dawn tih chu thil chiang sa a ni a, thil thar engmah chu ka hriat belh lo chungin a rawn let hun hi sawi theih a la  ni lo," tiin Manchester United hmachhawn tura a dam hman a beiseiawm loh.

Tuchel chuan sawi chhun-zawmin, "Kar khatna hi a pawimawh lai chu a ni a, an damdawi chawh a ngeih dan a zirin a hriat theih ang," a ti.

PSG hian Pathianni khan Rennes chu 4-1 in an sawp a, Neymar tel lo pawhin Ligue 1-ah harsatna an nei lo. He inkhelah hian Edison Cavani-a'n goal hnih a khung a, Angel Di Maria leh Kylian Mbappe ten goal khat ve ve an khung ve bawk.

French club hian Zenit St Petersburg aṭangin midfielder Leandro Paredes lakluh an tum a, pound maktaduai 35 man ni tura ngaih a ni. Tuchel chuan, "Mi zawng zawngin a fel vek tawh an tia, hmuh tur erawh a la awm lo," tiin a la fel kim loh thu a sawi.