I League boruak a nung thar leh ta

East Bengal-in Kolkata derby-ah hnehna an chang a, nimin inkhelah Real Kashmir chuan Chennai City an hneh ve leh bawk avangin I League nomawi inchuh boruak a nung sawt. 

Kolkata derby-ah East Bengal tan Jobby Justin chuan goal khat a khung a, Jaime Santos khung tur siamsak bawkin 2-0 in Mohun Bagan an hneh. 

Real Kashmir-in minute 81-naah Gnohere Krizo hmanga goal khungin Chennai City an hneh a, I League champion kawngkhar an hawng zau sawt. Chennai-in hma an hruai chhunzawm chungin an dinhmun erawh a derthawng ta hle. 

East Bengal hian match khata khel tlem zawk chungin point nga chiahin Chennai hi an phak lo a, Churchill Brothers leh Real Kashmir chu champion la beisei thei an ni bawk. 

Kolkata derby-ah East Bengal-in minute 35-naah goal hmahruai an khung a, he goal hi Justin-a'n Jaime Santos tana a siamsak a ni - Spanish midfielder hian league match sarihah goal thum a khungna a ni ta. 

East Bengal goal hnihna hi Jobby Justin vekin minute 75-naa a khung a ni a, he goal hi club captain Lalrindika Ralte-in corner a pet aṭanga ball lokal a tauh luh a ni. 

Mohun Bagan tan an chhuanvawr Sony Norde a bo tluanchhuak zak a, Haiti international hi Lalramchullova chuan vengin Armed Veng tlangval venna karah nuai 200 chuang hlawhtu forward a tal put zo lo. 

East Bengal tan hian Laldanmawia Ralte chuan inkhel bul a ṭan bawk a, minute 64-naa amah thlaktu Brandon VL Remdika'n a hun ṭha neih goal-ah a chantir thei lo - Bagan lamah Lalchhawnkima a inlan bawk.

East Bengal lamin 1-0 a hma an hruai mek laiin Bagan hian goal an khung ve a, mahse Bagan striker Aser Pierrick Dipanda goal khung chu offside vangin pawm a ni lo - boruak a sang hle. 

Bagan coach Khalid Jamil erawhin referee thutlukna a sawisel duh lo a, ama thiam loh a nih thu a sawi! Aizawl FC boss hlui chuan, "Referee chungchang ka sawi ngai lo a, kan chak lo a nih chuan keima thiam loh a ni mai," a ti. 

East Bengal defender Chullova'n Norde a dah 'ṭhat' danah fak a hlawh a, inkhelh zawh press conference-ah East Bengal boss Alejandro Menendez-a'n zawhna a dawn hnem phah. 

Mahse, Real Madrid reserve team boss hlui Alejandro chuan, "Norde tan khan engmah ruahmanna hran kan nei lo," tiin team thawhrah a nih thu a sawi.