Wimbledon an ṭhulh ang - Dirk Hordorff
German Tennis Federation (DTB) vice-president Dirk Hordorff chuan Wimbledon an ṭhulh a rin thu a sawi, grass court inelna lian ber hi tun kar chhung hian an kalphung tur an ti chiang ang.
Tennis inelna ngaihhlut Wimbledon hi June 29 aṭang hian All England Club-ah khelh tur ni mah se Covid-19 vangin an nei thei dawn em tih a chiang lo. Kum 1945 hnua a vawi khat nan ṭhulh mai theih dinhmunah a ding mek.
Hordorff chuan, "Nilaini hian an inhmukhawm dawn, chumi hunah chuan thutlukna an siam ang. ATP leh WTA huangah ka inhmang bawk a, tun dinhmuna a lan dan chuan Wimbledon hi an ṭhulh a rinawm.
"Fans awm loa inkhelh hrehawm zia chu player lamin an hre chiang a, inelna biuatsaihtu lam tan khawvel hmun hrang hrang aṭanga mikhual tam tak thlen khawm chu tunlai boruak thlirin zuam chi a ni lo bawk," a ti.
Grand Slam pali zinga pakhat French Open chuan May thlaah inelna an neih theih loh tur thu an ti chiang tawh, clay court inelna lian hian September thlaah neih tum a ni.
Hordorff chuan sawi zawmin, "Wimbledon hi chu sum leh paiah a dinhmun a nghelnghet ṭha tawk a, kuminah neih ni lo mah se buaina tur a awm lo ang. Hri leng mek do tlan nan chuan inelna neih rih loh hi a fuh a ni," a ti.
Coronavirus vangin tennis inelna zawng zawng chawlh lailawk vek a ni a, beisei dan chuan May thlaah tournament an khel leh ṭan ang. Mahse, European ram tam takah hri a len mek avangin an ruahmanna siamsa pawh hi 100% a rin theih a ni rih lo.