Midangte hlimna thlen beiseitu Alderweireld
Tottenham Hotspur defender Toby Alderweireld chuan coronavirus vanga damdawi ina awm mekte tan tablet engemaw zat a pe chhuak a, Belgium international chuan midangte hlimna thlentu nih a beisei vanga chutianga ti chu a nih thu a sawi.
Alderweireld chuan, "Kan tablet pek avangin ṭhenkhat chuan an chhungte an biak theih phah tih message thlengin kan dawng ṭan a ni," a ti a, hmingṭhat duh vanga thil ti a nih loh thu a sawi tel bawk.
Spurs defender ṭangkai hian a pa nen Covid-19 kaite ṭanpui theih dan tur an ngaihtuah thu sawiin, "Damdawi in ṭhenkhat kan bia a, phone nei lo kum upa lam zawkte hman tur tablet an mamawh thu min hrilh a ni. An nunah hlimna tlemte pawh ka thlen theih chuan chu chu a tawk em em a ni," a ti.
Tun season-a London club-in Premier League match 29 an khelh tawha vawi 27 bul ṭantu defender hian tablet tam zawk sem chhuak turin hma a la mek a, hun harsaah midangte ṭanpuitu nih a duh.
Covid-19 hri leng avangin Premier League pawh April 30 thleng chawlh a ni a, a hun hi pawhsei leh ngei a nih a rinawm - Alderweireld erawhin a eng zawngin a thlir thung.
Kum 31 mi defender chuan, "Hrehawm tak a ni, inkhelh leh thuai a châkawm a, engkim hi fel vek tawh se tih a duhawm takzet. Mahse, a êng zawnga thlir erawh chuan ka fate kiangah hun hmangin ka awm thei a, a hlu em em a ni.
"Engpawh ni se, April 30-a lo kir leh tura in ruahman hi tuna kan tih theih chu a ni," tiin ruahman lawk ang ngeia Premier League bul an ṭan leh theih a beisei hle.