Whyte vs Povetkin a thleng dawn lo
British heavyweight boxer rothap Dillian Whyte chu Russian fighter Alexander Povetkin nen May 2-a inhnek tura tih ni mah se coronavirus vangin an inhmachhawn a rinawm ta lo a, promoter Eddie Hearn chuan official-a thuchhuah an neih thuai tur thu a sawi.
Hearn chuan, "Thuchhuah kan siam thuai ang. Mahse, a nihna takah chuan an inhnek dawn loa tia sawi ngam a ni tawh," a ti a, hetihrual hian boxing khawvel chuan June-ah a dan pangngai anga engkim a kalpui leh theih a beisei thu a sawi thung.
British Boxing Board of Control chuan an thuneihna hnuaia fight awm tur zawng zawng chu April thla tawp hmaa neih a phal lo a, Whyte te inhnek hun tur hi May 2-a nih avangin British boxer hian beiseina sang tak a nei.
Kum 31 mi boxer hian kar hmasa lawk khan ruahman anga an inhnek hi kaltlangpui a nih a beisei thu a sawi a, training pawh ngawrh takin a nei reng - tunah erawh a beisei dan lo takin thutlukna siam a ngai ta niin a lang.
Whyte hian inhnek a hmachhawn tawh vawi 28-ah vawi 27 hnehna a chang thei a, vawi khat chiah la tlawmin a ngam loh awmchhun hi Anthony Joshua a ni.
Kum 40 mi Povetkin hian inhnek a hmachhawn vawi 38-ah vawi 35 hnehna a chang a, Wladimir Klitschko leh Joshua lakah tlawm tawhin a fight hnuhnung berah Michael Hunter chu a inhnehtawkpui - 2011-2013 inkar khan WBA (Regular) heavyweight title a lo kawl tawh.