Premier League hmahruaitu Liverpool inlan zan

Liverpool chuan zanin dar 1:30 hian Leicester City an mikhual dawn a, Premier League champion tum tan Foxes lakah tlawm a thiang lo ang. 

Premier League hi tun dinhmunah chuan Liverpool leh Manchester City inchuh bik anga sawi theih a ni a, nizan khan City hian Newcastle United chu lenchilhin he thu buatsaih a nih lai hian result kan hre hman lo. 

Manchester City hian hnehna an chang a nih chuan point khat lekin Reds hi an thlau ang a, zanina inlan tur Liverpool hian pressure nei chungin Foxes an mikhual dawn tihna a ni. 

Liverpool hian May 12-ah an league match hnuhnung ber atan Wolverhampton Wanderers an mikhual dawn a, ticket zuar chhawngtu website ṭhenkhat chuan he inkhel ticket hi £6,000 (Nuai 5.61) ten an zuar chhawng der tawh - hei hi Liverpool champion lai hmuh duh an tam vang a ni!

Liverpool hi league match 23 an khelh tawhah vawi khat chiah an la tlawm a, fans tam takin an match tawp ber Wolves nena an khel tur manto zawka en an huam hi thil mak a ni hran lo. 

Heti chung hian Reds forward Sadio Mane chuan an ṭhat dan bera an la khelhchhuah loh thu a sawi - league match 23-ah goal 54 ngawt an khung tawh a, an lama lut chu 13 chauh a ni!

Mane chuan, "Media ṭhenkhat chuan season hmasa ang khan kan hmuhnawm lo niin an sawi a, result chu kan nei ngei a, mahse hei aia ṭha zawka la khel thei kan ni. Mamawh hunah tak kan ṭhat dan ber zela kan khelh ka beisei," a ti. 

Reds forward hian Premier League nomawi thlirin, "Liverpool tana league nomawi chawi hlan ka nghakhlel takzet a ni. Hetiang ang club tan chuan league nomawi chawi loh chhung hi a rei tawh mah mah a ni," a ti - Liverpool hi kum 1990 hnuah league-ah an champion leh tawh lo. 

Liverpool-in season dang zawng aia hma an sawnna chu tlarhnung a ni a, an hmasawnna atana player pawimawh tak chu khawvela defender manto ber Virgil van Dijk a ni. 

Dutch defender hoin Reds tlarhnung nghing ṭhin a reh a, a bula dingte thlengin inrintawkna an neih phah ṭhin - mahse Netherlands international hi Dubai-a training an neihna aṭanga an haw hnuah a damlo.

He thu buatsaih a nih lai hian VVD inlan theih dawn leh dawn loh a la chiang lo a, Trent Alexander-Arnold leh Joe Gomez an la inhliam a, tlarhnunga chhawr theih James Milner chu hrem vangin a inlan thei dawn lo bawk. 

Leicester striker Jamie Vardy-a'n Liverpool lakah goal sarih khung tawhin Reds laka goal khung tam lamah Andy Cole (11) leh Thierry Henry (8) chiah a tluk lo - VVD awm loh chuan Liverpool tlarhnung a zuam sawt ang. 

Premier League club tan Liverpool hmachhawn châkawm lai ber thlang dawn ta se, tun season bikah chuan tun tluka Reds hmachhawnna hun ṭha  a awm chuang lo - tun hnaiah an nghing tlat!

Liverpool hian  Manchester City chu 1-2 a an ngam loh hnuah Wolves chu FA Cup-ah an ngam lo zui a, khel ṭha lo chungin Brighton chu 1-0 in an hneh hram a, Crystal Palace laka 4-3 a an chaknaah pawh 'vanneihna' a tel tih phat rual a ni lo. 

Reds ṭantute tan erawh thawnthu hlui hriat a nuam ang - league match-a an intawn hnuhnung pathumah an chak vek a, Anfield-a an intawn hnuhnung vawi sarihah vawi ruk an chak bawk!

Tun season-a an intawn hmasak zawkah 2-1 in Liverpool an chak a, Sadio Mane leh Roberto Firmino ten goal khat ve ve an khung - anni pahnih hi Mohamed Salah nen an pawimawh leh ang.