Mizoram Police an chak

67th BN Mullick Memorial All India Police Football Championship chu January 28 aṭang khan Malappuram, Kerala-ah khelh ṭan a ni a, Mizoram Police chu Madhya Pradesh, Assam Rifles, Gujarat leh Rajasthan nen group khatah an awm.

Mizoram hian match hmasa berah Rajasthan chu 9-0 in an sawp a, F. Lalrinpuia chuan hattrick siamin Malsawmfela'n goal hnih a khung a, Lalnundanga, R. Lalthantluanga, V. Lalṭanpuia leh Lalfakzuala ten goal khat ṭheuh an khung.

Nizan khan Mizoram hian Gujarat an hma-chhawn a, result kan hre hman lo. Vawiin tlai dar 3:00 hian Madhya Pradesh an hmachhawn ang a, February 1 zan dar 9:00-ah Assam Rifles nen group match hnuhnung ber an khel ang.