Thla ruk chawl tur Marin

Olympic, World leh European badminton champion ni vek Carolina Marin chu a khup hliam vangin thla ruk chhung a chawlh a ngai dawn a, August thla a khelh tur BWF world championship-ah a inlan thei a ngem tih chu zawhna lian tak a ni nghal.

Pathianni khan Marin leh Saina Nehwal ten Indonesia Masters final an khel a, game khat pawh an khelh zawh hmain Spanish shuttler hi hliam vangin a inkhel zui thei lo, a hliam endik a nih hnuah a chawlh chen tur hi a chiang.

Kum 25 mi Marin chuan, "Thil harsa leh hrehawm ber hmachhawn hun a ni. Mahse chiang taka ka sawi theih erawh chu, tun hma aia ṭha zawkin ka rawn kir leh ang," tiin a sawi.

Spain nula Marin hi Asian badminton player ṭha tak taka kara European player rawn chawr chhuak nawlh a ni a, nikum khan player dang ten an la tih theih ngai loh BWF World Championship-ah a vawi thum nan a champion a ni.