Iran tan Samurai Blue an hriam!

Asian Cup final-ah Japan an lut a, Thawhṭanni zan khan semifinal-ah team ṭha Iran chu 3-0 ngawtin an sawp - Iran tan tih theih a awm lo.

Samurai Blue (Japan sawina) tan match hmasa bera a inhliam avanga a inlan loh reng hnuah Yuya Osako chuan mamawh chhanna a ni tih pholangin goal hnih a khung a, Genki Haraguchi chuan goal khat a thawh ve bawk. 

Japan-in hnehna an chan avangin kum 1992 hnuah ringawt pawh Asian Cup final an luh vawi ngana a ni a, kum 2004 hnua a vawi khat nana semifinal khel ve leh chauh Iran beiseina chu boruakah a thamral.

 

Asian Cup final hi Zirtawpni zanah khelh a ni dawn a, nizana Qatar leh UAE inkhela chak zawkin Japan hi Asian champion nih an inchuhpui ang. 

Inkhel ṭantir lamah Iran-in na taka nawr tumin theihtawp an chhuah a, hun ṭha nei hmasa zawk erawh Japan an ni -  Yuto Nagatomo, Maya Yoshida leh Ritsu Doan ten an chance hlauhawm neih an hlah vek. 

Iran an ngawi reng bik lo. Rubin Kazan striker ṭha Sardar Azmoun shot neih chu FC Tokyo goalkeeper Shuichi Gonda chuan ṭha zetin a dan sak. Chawlhlawk hman a nih hnuah Iran-in chance an neih chhunzawm a, Ashkan Dejagah leh Ehsan Hajisafi ten an hun ṭha an khawhral.

Minute 56-naah Iran an chesual - Hossein Kanani chuan Takumi Minamino a ti tlu a, referee lam hawi zuiin a ban a phar. Red Bull Salzburg forward Minamino-a'n hei hi remchangah lain ball a la zui a, Osako tana remchang taka tauh luh turin a siamsak. 

Minute 67-naah Minamino-a'n Morteza Pouraliganji kut pet perin penalty a hlawh chhuak zui a, Werder Bremen forward Osako vekin goal-ah a chantir - Haraguchi chuan hun pek belhah a khung leh a, 3-0 in Japan an chak. 

Iran-in Asian Cup final an thleng zo lo a, coach Carlos Queiroz chuan kum riat hnuah Iran a enkawl chhunzawm tawh loh tur thu a sawi. Real Madrid boss hlui chuan, "Kan zinkawng hlimawm tak avang hian ka inchhuang a, Iran player-te hian hma an sawn nasa hle a ni," tiin thlahna thu a sawi. 

Portugal leh South Africa pawh lo enkawl tawh coach chuan, "Dik taka sawi chuan final khelh hi an phu em em a, mahse tun atan chuan keipawh hei hi ka tawpna tur a ni ta. Kum riat chhung he team ka enkawl theih avang khan ka inchhuang a, an hma hun zel atan duhsakna ka hlan a ni," a ti. 

Iran hian an goal hmasa ber an chhuah hnu lawkah khan insiamṭhatna remchang an nei a, mahse Brighton winger Alireza Jahanbakhsh freekick ṭha zet chu Japanese keeper Gonda chuan ṭha zetin a dang a, Morteza Pouraliganji chuan uiawm takin a tauh lut lo bawk. 

Kum 65 mi Queiroz hian Iran kum riat a enkawl chhungin a win percentage chu 60% a tling pha a, World Cup-ah vawi hnih inlanpuiin Asian Cup vawi hnih a khelhpuiah quarterfinal leh semifinal a hruai thleng.