Chelsea hi team ṭha ber zinga mi an ni - Howe

Zanin dar 1:15 hian Bournemouth-in an mual Dean Court-ah Chelsea an mikhual dawn. Cherries boss Eddie Howe chuan Blues laka point hlawhchhuah a harsat tur thu a sawi.

Howe chuan, "Chelsea lakah point kan beisei kan nei a nih chuan kan ṭhat dan berin kan khelh a ngai tih kan hria. Tun hnaia Chelsea khelh danah duh khawp lohna te a awm ṭhin a, amaherawhchu kan hmachhawn ṭum chuan team ṭha ber zinga mi an ni ziah," tiin an khingpui tur a dah sang hle.

Chelsea hian Arsenal an hneh loh hnuah Tottenham hnehin League Cup final an thleng a, FA Cup-ah Sheffield Wednesday 3-0 a hnehin fifth round an thleng leh bawk. Bournemouth pawhin match nga chhung chak hmel an hmuh loh hnuah West Ham chu 2-0 in an hneh a, Blues tan chetsual theihna an ni ang.

Cherries hian tun thla tir khan Liverpool aṭangin Dominic Solanke an lalut a, English forward hian training zawm tawh mah se February-ah chauh a club thar tan hian an chhawr ṭan ang. Chelsea thuthar erawh rawlthar duhawm Callum Hudson-Odoi a chungchang a ni a, English winger hian chhuah dil mah se club thuneituten an rem tihsak lo.

Hudson-Odoi hian Sheffield Wednesday an hneh ṭumin goal mawi zet a khung a, hemi hma hian chhuah dilna a thehlut. Germany club lian Bayern Munich-in pound maktaduai 35-in kum 18 hi lakluh an duh a, January transfer tingaihnawmtu zinga mi a ni.

Amaherawhchu Chel-sea hian an ṭanna sawh sawn an tum lo a, Hudson-Odoi hian a contract-ah thla 18 chiah a neih tawh avangin nipui bazarah chuan kum khat chiah contract a nei tawh dawn tihna a ni a, a hlutna hi a tlahniam ang.

Chelsea striker thar Gonzalo Higuaín-a'n London club tana match hmasa berah goal a khung lo a, Argentine forward hian a penalty pet tur chu Willian hnenah a hlanchhawn avangin a langsar a, zaninah chuan supporter-ten a goal khung lai hmuh an duh ang. Cherries hian Blues hi an mikhual hnuhnung pangaah an hneh lo vek.