Filippo Inzaghi an ban

Serie A mawngphah lama talbuai mek Bologna chuan an coach Filippo Inzaghi an ban a, a hmun ruak luah tur hian tun hma lama an club enkawl tawhtu tho Sinisa Mihajlovic an lalut nghal.

Italy international Inzaghi hian nikum June thla khan Bologna hi a enkawl ṭan a, league match vawi hnihah chiah hnehna a chanpui theih avangin tun dinhmunah 18-na an ni mek, a him china awm chu point thumin an phak lo mek a ni.

Inrinni zan khan anmahni ang bawka team talbuai Frosinone chu 4-0 in an hneh lo. Club neitu Joey Saputo chuan, "A lungchhiat thlak takzet," tiin a sawi a, hemi hnu lawkah Bologna chuan thuchhuah siamin Inzaghi an ban thu leh club tana a hnathawh vanga a chunga an lawm thu an sawi nghal. 

Inzaghi tlaktu Mihajlovic hian 2008-09 season khan Bologna hi a lo enkawl tawh a, beisei angin a hlahwtling lem lo. Portuguese club Sporting Lisbon-ah beiseina sang tak nen bul ṭan thar tum mah se, an club in hruaitu an neih thar avangin hna thawk tura lakluh a nih aṭanga ni kua a liam tihin ban a ni!

Italian champion vawi sarih ni tawh Bologna hian 1964 hnu lamah league nomawi an la chawi leh lo a, kum 49 mi Mihajlovic kaihhruaina hnuaiah hian champion an tum dawn rih lo, an thil tum hmasak tur chu Serie A khel zui thei tura inhamtan a ni ang.