Goa-ah goal a lut lo

Indian Super League-ah Thawhṭanni zan khan FC Goa chuan Jamshedpur FC an mikhual a, team pahnih hi goal khung loin an ṭin - team pahnih hi table-ah point khatin an inthlau a, match khata khel tlem chungin FC Goa an chungnung zawk. 

Jamshedpur tan an mikhualna ramah goal­keeper Subrata Paul chu 'hero' a ni a, Indian keeper tawnhriat ngah hian Bran­don Fernandes leh  Ferran Corominas te pet goal ngei tur nia ngaih chu ṭha takin a dang - hero of the match-ah thlan zui a ni. 

Jawaharlal Nehru Stadium, Goa-a inkhelah hian Jamshedpur tan Jerry Mawihmingthanga leh Malsawmzuala te an inlan a, Mizo tlangval pahnih hi second half-ah bench aṭanga luhtir an ni thung. 

Zanin ISL-ah inkhel pakhat a awm dawn a, Mum­bai City hneh lo hlim Bengaluru FC chuan team ṭha NorthEast United an mi­khual dawn - inkhel hmuh­nawm beisei ngam tur a ni. 

Bengaluru hi match khata khel tlem chungin Mum­bai nen an point hmuh zat a in ang a, anni hi Mizo rawlthar Ed­mund Lalrindika leh Sai­ruat­­kima kawltu an ni a, High­landers hian Robert Lalthlamuana, K. Lalṭhathanga leh Lalrempuia Fanai an kawl thung.