Zaninah Cristiano Ronaldo vs Duvan Zapata

Cristiano Ronaldo hming hrilh nawn kan ngai lo a, Colombia inter­national Duvan Zapata erawh mi tam zawkin an hre kher lo ang. Player pahnih hian inanna an nei, tun season Serie A goal khung hnem pahnih niin goal 15 ve ve an nei tawh.

Zanin dar 1:15 hian Atalanta khelmual Atleti Azzurri d'italia-ah Juventus chu Coppa Italia quarterfinal khel turin an lenglut dawn a, Ronaldo leh Zapata te hi player en hlawh bik an ni ang.

Season hmasa khan Juventus hian final-ah AC Milan hnehin a zawna a vawi li nan an champion a, he inelna bika hlawhtling ber turin ṭum 18 an champion tling chiah bawk; kuminah pawh rinkai ber an ni.

Turin club leh Atalanta te hi December 26 khan league match-ah an intawng tawh a, 2-2 a in­hnehtawkin Ronaldo chu bench-ah dah a nih laiin, Zapata erawhin goal hnih a khung thung - zaninah hian chak zawk chiang sa anga sawi ngawt theih an awm bik lo.

Juve manager Massimiliano Allegri chuan, "Inkhel hautak hma­­chhawn zawn turin ka naute ka hrilh," tiin Lazio nen an inkhelh zawh­in a sawi a, zanin hi an tan fiahna lian tak a tling dawn.

Italian manager hian hliam vangin defender rinrawl Leo­nardo Bonucci an chhawr thei dawn lo a, hetih lai hian Miralem Pjanic, Sami Khedira leh Mario Mandzukic te erawhin training an zawm leh vek tawh thung.