Entu nei lo turin Marseille an hrem
French rama football thuneitu sang ber Ligue de Football Professionnel (LFP) chuan Marseille chu Inrinni zana Lille an hneh loh ṭuma fans chet dan mawi lo vangin an hrem a, an khelmuala match an khelh leh hmasak berah entu an awm thei dawn lo.
Kar tawp Ligue 1 inkhelah hian fans lam aṭangin kangmei an ti chhuak a, Marseille player pahnih Kevin Strootman leh Jordan Amavi te hnaih takah thil an tih puah bawk avangin minute 30 chhung vel inkhel an chawl lailawk hial a ni.
Inkhel ṭan hma hian Marseille fans lamin club neitu leh coach an duh lohna an lantir avangin minute 10 chhung velin inkhel an ṭan tlai tawh bawk a, match laklawh laia buaina a chhuah avangin an chungah thununna lekkawh a ngaih phah.
LFP chuan, "Thil thleng chungchang hi ngun taka chhui vek tur a ni a, kan him tlan zawk nan February 5 zana Bordeaux nen an inkhelh hunah chuan stadium chhungah fans an lut thei lo ang," tiin thuchhuah an siam.
Marseille hian nikum November thla hnuah inelna hrang hrangah vawi khat chiah hnehna an la chang a, cup inelna pathum aṭanga pet chhuak an nih vek bakah league table-ah pawh pasarihnaah an tlahniam tawh bawk a ni.