Nomawi duh Solskjaer hmabak a ko

Manchester United manager lailawk Ole Gunnar Solskjaer chuan Champions League khelh phak ringawtah an lungawi lo a, nomawi chawi ngei an tum tur thu a sawi. Amaherawhchu, United hian FA Cup-ah champion lai Chelsea nen fifth round-ah an inhmachhawn dawn, Champions League-ah Paris St Germain an khelhpui dawn bawk avangin hmabak a ko hle.

United hian nizan khan Burnley an hmachhawn a, result kan hre hman lo. Solskjaer hote hian hnehna an chang a nih pawhin parukna aṭanga pangana ni tur chuan Arsenal an chetsual a ngai dawn tho. Norwegian manager Solskjaer chuan, "Man United kan ni a, league nomawi chawi kan tum tur a ni. Tun season-ah erawh a theih tawh lo a, league nomawi chawi ngei erawh kan tum leh tur a ni ang," tiin an dinhmun a hrechiang hle.

Manchester United tana nomawi la chawih theihna chu FA Cup leh Champions League a ni a, awlsam tur zawka ngaih FA Cup-ah Chelsea nen an inhmachhawn dawn a, Stamford Bridge-a an khelh dawn bawk avangin quarterfinal thlen a harsa dawn.

Mahse, Solsjkaer chuan, "Champions League leh FA Cup khelh tur a la awm miau a, chuvang chuan league-a palina chin nih ringawt hi kan tum tur a ni lo. Kuminah champion theih a awm em tih kan thlir zawk tur a ni a, Man United manager hna ka chelh hnu chuan match zawng zawng hi chak tumin ka hmachhawn vek a ni," tiin a rilru put hmang a sawi chhuak.

Manchester United hian February 12 zanah French champion PSG an hmachhawn dawn a, February 17-ah Chelsea nen FA Cup-ah an inkhel lehnghal ang a, February 24-ah Liverpool nen league-ah an inkhel lehnghal dawn. PSG nen second leg an khelh zawhah pawh Arsenal leh Man City te league-ah an khelhpui leh dawn a, Tottenham ang thoin fixtures fuh loh avangin kar hnih khat chhungin nomawi beiseina a tawp vek thei tihna a ni.

United hian kum 2017 khan Jose Mourinho hoin Europa League leh League Cup nomawi an chawi a, hemi hma season hian Louis van Gaal hoin FA Cup-ah an champion bawk. Premier League-a an champion hnuhnun ber erawh 2012-13 season daih tawh kha niin Sir Alex Ferguson-a hunlai a ni a, Champions League-a an champion ṭum pawh 2007-08 season daih tawh kha a ni.

Solsjkaer chuan, "Nomawi chawi ni hi club chhunga awm zawng zawng tan hun danglam bik a ni. A chhan chu nomawi chawi leh hun tur hi a hriat ṭhin lo a, manager pawhin nomawi tawh phawt chu nuam ti takin chen rawh u an ti ṭhin," tiin nomawi hlut zia a hrechiang.

Norwegian manager hian Manchester United tana a khelh laiin Premier League nomawi paruk a chawi a, FA Cup pahnih bakah Champions League nomawi chawi bawkin ṭawng huai turin a inkhelh hun laiin sulhnu a nei ṭha hle.