Inelna pahnih kan la hmabak - Poch

Tottenham Hotspur manager Mauricio Pochet-tino chuan FA Cup leh League Cup aṭangin tla tawh mah se an la beidawn loh thu a sawi a, Premier League leh Champions League an ngaihpawimawh thu a sawi bawk.

Spurs hian hliam vangin Harry Kane leh Dele Alli te an chhawr thei lo mek a, anni pahnih bakah hian South Korea international Son Heung-min chu Asian Cup khelh vangin match thum chhung an chhawr thei lo.

Mahse, kum 26 mi Son hi tunah chuan Tottenham-ah a kir leh tawh a, zanin dar 1:30-a Watford an mikhual hunah chhawr theih a ni leh tawh ang - Spurs tan an forward rawn kir leh ta hi lawmna tham a tling ang.

Tun hnaiah inelna pahnih aṭangin tla mah se Tottenham manager a zam lo. Poch chuan, "Inelna lian pahnih Premier League leh Champions League-ah dinhmun ṭha tak kan luah mek a, hei hian chona leh phurna ṭha tak min pe ngei se ka duh. Chhel takin kan awm tur a ni a, hlawhtlinna chang ngei tura min beiseina tih hlawhtlin kan tum ang," a ti.

Argentine manager Pochetino-a'n Tottenham a enkawl china Watford an hmachhawn ṭumin goal 15 an khung tawh a, heng zinga 11 hi Kane, Alli leh Son te khung a ni - Son a pawimawh dawn hle a ni.

Watford lam hian hliam nei loin Tottenhman an lenchilh thei dawn thung, an match hnuhnung bera Newcastle an hneh ṭumin match hmasa zawka a chhawr player 11 ngawt a siksawi a, zaninah pawh a siksawi leh a rinawm.

Watford boss Javi Gracia chuan, "Min ring rawh u, duhthlan tur ngah hi team tan a ṭha a ni. Ka naute lakah rinna ka nghat ngam vek a, player tin hian an hun ṭha inherchhuah hun an nghak vek a ni," tiin a sawi.