Manchester City an vannei

Thawhṭanni zan khan FA Cup fifth round fixtures pawh a ni a, champion rinkai zinga mi Manchester City hmabak a harsa dawn lo. Pep Guardiola hote hian February 17-a FA Cup fifth round-ah Middlesbrough leh Newport County inkhela chak zawk an hmachhawn dawn.

Championship club Boro leh League Two club Newport te hi 1-1 in an inhnehtawk a, replay-ah hian eng team pawh chak se Pep Guardiola hote tan hna harsa tur niin a lang lo. Citizen hi khualmuala khel tura pawh an ni a, Etihad Stadium-a khelh kher ngai loin minute 90 chhunga zawhfel nghal an tum ang. 

FA Cup fifth round-ah hian team 11 an lut tawh a, hmun ruak panga dang hi replay hmangin February 5 zanah la zawn tur a ni. Premier League club panga Manchester City, Manchester United, Chelsea, Crystal Palace leh Watford ten last 16 hi an lut tawh a, Brighton & Hove Albion leh Wolverhampton Wanderers ten replay an la khel dawn thung.

Premier League big six aṭangin club pathum chiah an dam tawh a, United leh Blues an inhmachhawn dawn avangin quarterfinal-ah big six aṭangin club pahnih emaw pakhat chauh an dam tawh dawn tihna a ni. FA Cup inelna a hlu lo sawt dawn a tih theih a, chutihrualin FA Cup hlutna chhan tihin a sawi theih bawk.

League One club AFC Wimbledon leh Doncaster Rovers te chu fifth round lut tawh zinga league awmna dinhmun hniam ber an ni a, amaherawhchu replay khel tur zingah National League club Barnet an la awm. National League hi league inchher chhuan danah chuan chhawng ngana (fifth tier) a ni a, Premier League nen an inkarah Championship, League One leh League Two te a awm a ni.