Mittui, lawmna leh thil theihnghilh lian tak!

"Nui tur ka ni, mahse ka nuih theihnghilh daih. Nilengin final kan khelh tur chauh kha ka ngaihtuah avangin ka hamhaih a ni," tiin Australian Open champion Naomi Osaka chuan nomawi a chawi hnuah a sawi, hun hlimawm a tawn laiin Japanese nula hi a nuih theihnghilh!

Kum 21 mi Osaka hian nikuma US Open nomawi a chawi khan Serena Williams chungchangin sawi a hlawh zawk a, kuminah erawh ani aia chanchin nei lian an awm ta lo. World number 1 thar chuan, "Inelna ka hmachhawn leh hunah chuan ka hming bulah number 1 tih a inziak ang, mahse chu aia pawimawh zawk chu nomawi chawi a ni," a ti.

Novak Djokovic pawhin, "Rawva leh chapo tak anga chet ka duh ngai lo, mahse ka thinlungah hian ka ti thei a ni, tiin ka infuih reng ṭhin. Ka hlawhtlin theih chhan pawh a ni," tiin Australian Open champion hnem ber a nih theihna thuruk a sawi.

Tennis season khat chhunga Grand Slam hmasa ber Australian Open chu January 14-27 chhung khan Melbourne, Victoria, Australia-ah khelh zawh a ni a, hard court (Plexicushion) inelna lian hi a vawi 107-na chiah niin, inkhel ropui leh hmuhnawm thleng leh tur chuan season khat an nghah tluan leh rih phawt a ngai dawn.

Lawm avangin bianga mittui a luan chang a awm a, vanduaina tawh vanga thinlung rum a taka lanchhuah nan mittui a luan chang a awm bawk. Australian Open khelh ṭan hmain Andy Murray chuan atan Grand Slam hnuhnung ber a ni mai thei niin a sawi - tennis ngaina tute a barakhaih hle.

World number 1 hlui hian khel bawr na vangin season hnih chhung a hmang mumal thei lo, "Na nei reng chunga inkhelh chu ka tlin lo," a ti a, Wimbledon erawh khelh ngei a duh thu a sawi bawk. Match hmasa berah Roberto Bautista Agut hneh lo mah se, set hnih a hloh hnuah set hnih a la let thei. Darkar li leh minute kua an khelh hnuah mittui nen court a chhuahsan.

Player beiseiawm Alexander Zverev-a'n Grand Slam bikah fourth round a la paltlang thei lo zel a, French Open finalist Dominic Thiem pawhin khawtual tlangval langsar lo tak Alexei Popyrin a ngam lo bawk - player pahnih hian an thinrim insum zo lo an tuar tih a lang; inelna liana hlawhtling tur chuan dawhtheihna an zir belh a la ngai.

Djokovic-a'n a elpui Rafael Nadal hnehin Grand Slam nomawi 15 a chawi tling ta. Nikum July thla khan a kiu hliam zai hnuah a rawn kir chiah a, tunah chuan Grand Slam hnuhnung pali zinga pathum a chawi thei.

May 26 aṭanga khelh tur French Open-ah a champion thei a nih ngat chuan a vawi hnih nan major title pali chu vawi khatah a kawl rual vek thei dawn. Ani aia Grand Slam chawi hnem zawk Nadal (17 titles) leh Roger Federer (20) te tluk tur chuan clay-ah hlawhtlin leh zual a mamawh.

Kum 31 mi Djokovic chuan, "Season hmasa ai khan clay-ah ka khelh ṭhat a pawimawh dawn, nikum ai chuan tunah hian ka khel ṭha zawk. Mahse clay-ah a 

ṭhat leh zual a ngai dawn, champion ka tum ngam tur a ni ang.

"Elpui hautak ber tur chu Nadal a ni leh dawn, chutih rualin Dominic Thiem, Alexander Zverev leh Roger te pawh sawi hmaih theih an ni lo. Player ṭha an tam a, chung zinga chuan clay bika ṭha zualte hneh dan hriat chu ka tan chona a ni dawn," tiin a sawi.

Kum 32 mi Nadal chuan chiang taka a chak lohna a pawm a, chutih rualin tun hma pawhin player dang pawh an elpui lakah an chak loh ve fo tawh thu a sawi, "Player ṭha ber ber pawh an chak lo ve thei," a ti. 

Australian Open vawi khat champion tawh Nadal hian set hloh miah loin final a lut a, #10yearchallenge ti hlawhtling turin 2009-a nomawi a chawina hmunah a hlawhtling leh ngei dawn niin a lang hman. Mahse, final-ah erawh Serbian tlangval lakah set a la lo.

Spanish tlangval chuan, "Novak khelh dan kha rinphak bak a ṭha ni. Player ṭha tak, a theihna sang ber nena che chhuak mek ka hmachhawn avangin thil a awlsam lo. Chutih rualin ka taksa khan kha baka nasa a khelh chhuah chu a tlin rih lo a ni," a ti. Tun thla tir khan Nadal hi hliam vangin Brisbane International aṭangin a inhnukdawk a ni.

Tunlai ṭhalai dangte ang bawkin Stefanos Tsitisipas kha Youtube lawm tak a ni. Greek tlangval hian internet kaltlanga video en theihna Youtube aṭangin Federer inkhel a en ṭhin a, inzir nan a hmang bawk - champion lai Swiss star hi fourth round-ah a hneh hial!

Kum 20 mi Tsitsipas hian an ramah a hmingin restaurant a nei bawk a, tunah erawh tennis a khelh thiamna hi a chanchin lian zawk a ni tawh dawn - Australian Open third round lut thei chinah khan a naupang ber; Nadal hneh lo mah se khawvel hmuhah a theihna san zia a lantir.