Art Workshop-cum-Exhibition buatsaih

Urban Development & Poverty Alleviation (UDPA) department chuan, nimin khan Aizawl Art Gallery-ah ‘Art Workshop-cum-Exhibition’ an buatsaih a, School Education minister Lalchhandama Ralte-in a hawng. Art Workshop hi Swachh Bharat Mission (Urban) hnuaia UDPA hmalakna thar a ni.

Workshop hawnna hi Mizoram Art Deve­lopment Society (MADS) president Lalṭan­puia'n a kaihruai a; mi­nister Lalchhandama Ralte chuan, India ram pumah Swachh Bharat Mission (SBM) sorkarin kaltlangin faina lamah nasa takin hma a la mek zel tih sawiin, "Hemi zarah hian India hmél danglam khawpin sorkar leh mipuite ṭangruala hna thawh a lang ṭan tawh a ni," a ti.

Lalchhandama Ralte chuan Art Workshop-cum-Exhibition-a tel tur lemziak thiam zawng zawngte duhsakna hlanin, "Taksa leh páwn lam faina bakah, kut fai leh thinlung thianghlim nei ṭheuh tura mahni insiamṭhat leh hmasawn tuma pawimawh hle a ni," a ti a; faina chungchang mipui zirtir kawngah bâng bik an awm lo tih sawiin, media-in faina chungchang tarlang tam se, chanchinbuahte editorial-ah faina lam hawi ziak uar se a duh thu a sawi.

UDPA director Joseph H Lalramsanga chuan, kum 2015 aṭangin ram pumah SBM kalpui a nih thu leh Mizoramah chuan SBM (Urban) chu UDPA department kuta dah a nih thu a sawi a; Art Workshop-cum-Exhibition-a faina thupui hmanga lemziak zawng zawngte chu UDPA-in copyright a chang ang a, faina lam hawi thil tih leh thuziak leh advertisement an neih reng rengah UDPA-in an hmang zui thei dawn tih a sawi bawk.

Art Workshop hi vawiinah chhunzawm a ni dawn a, lemziak thiamte'n ‘Faina’ tih thupui hmangin lem an ziak dawn a ni. Art Exhi­bition bik chu Aizawl Art Gallery-ah February 1-8, 2019 chhungin neih a ni dawn a, faina lam hawi lemziak ṭhahnem tak pho chhuah a ni ang.