Kylian Mbappe a lungawi lo

Inrinni zan khan Paris St-Germain chuan Montpellier 5-0 a sawpin Ligue 1 lamah fal takin a kal fawr mek a, an lawm erawh a kim lo - forward Kylian Mbappe a lungawi loh bakah Neymar chuan hliam tenau a nei bawk.

Paris khawpuia inkhelah PSG tan hian Pablo Sarabia, Angel di Maria, Daniel Congre (OG), Mbappe leh Layvin Kurzawa ten goal an khung. Mikhual Montpellier player Dimitry Bertuad (17') leh Joris Chotard (88') te hnawhchhuah an ni a, tho chhuak turin theihna an nei lo.

PSG manager Thomas Tuchel-a'n hnehna an chan chian tawh hnuah Mbappe la chhuakin Mauro Icardi a dahlut. League goal 14 khung tawh Mbappe hian khelmual a chhuahsan laiin a lungawi lohna a lantir a, a ṭhut hnuah pawh a lawm lo hle tih a hmelah a lang.

Tuchel chuan, "Thil ṭha tak chu a ni lo, chutih rualin hetiang thil hi chu club dangah pawh a thleng fo. Keini chauh hi a thlenna kan ni lo, amaherawhchu tennis khel kan ni lo a, football khel kan nih avangin player dangte kan ngaipawimawh thiam tur a ni," tiin thawhhona ṭha a pawimawh thu a sawi.

Brazilian forward Neymar chuan defender Arnaud Souquet nen ball an inchuhna lamah hliam tenau a tuar, hun rei deuh tak enkawl lailawk ngai mah se Barcelona player hlui hi thlak ngai loin a khel tluan thei.