Man City-in record an siam

Nilaini zan FA Cup last 16 inkhelah Manchester City-in Swansea 3-1 in an hneh. Liberty Stadium-a inkhelah hian Man City tan Kyle Walker, Raheem Sterling leh Gabriel Jesus ten goal khat ṭheuh an khung a, goal thum luh hnuah mualneituin Morgan Whittaker hmangin goal khat an khung ve hram.

Pep Guardiola hote hian inelna hrang hrangah match 15 chhung an chak zawn tawh a, tualchhung inelnaa chak zawn rei ber record an siam. Preston (1891-92) leh Arsenal (1987-88) te a zawnin vawi 14 an chak tawh a, kum 30 chuang record hi Man City-in an khum a ni.

Spanish manager Pep Guardiola chuan, "Kan thiltih hian ka player-te danglam zia a pholang. Record kan siam tih kan hria a, kan hnathawh hi kan ngai hlu hle. Krismas vuakvet hi inkhelh harsat lai ber a ni a, heti chunga ṭha taka kan khel thei hi a lawmawm a ni," tiin chhuang takin an record chungchang a sawi.

Manchester City hian record siam tur hian goal 40 an khung a, goal nga chiah an chhuah. Chutihrualin talbuai lai erawh an nei. December 12 khan Man City hi Old Trafford-ah an lenglut a, goal awm loin an inhnehtawk. 

Pep Guardiola hote hian United an hmachhawn zawhah table hnuai lama awm West Brom nen 1-1 in an inhnehtawk leh a, hetih hunlai hian Man City chunga rinna a tla hniam hman hle.

Amaherawhchu City an insiamṭha a, Southampton (1-0), Arsenal (4-1, League Cup), Newcastle United (2-0), Chelsea (3-1), Man United (2-0, League Cup), Birmingham City (3-0, FA Cup), Brighton (1-0), Crystal Palace (4-0), Aston Villa (2-0), Cheltenham (3-1, League Cup), West Brom (5-0), Sheffield United (1-0), Burnley (2-0), Liverpool (4-1) leh Swansea (3-1, FA Cup) te an hneh vek.

Pep Guardiola hote hian an thiampuipa Kevin de Bruyne leh Sergio Aguero tel loin Premier League champion lai Liverpool 4-1 in an sawp thei a, League Cup-a Man United an hneh dan leh league-ah sum hmang tam Chelsea te an hneh bawk avangin an record hi sawi nep theih a ni lo.

Manchester City hi nomawi lian tham pali chawi thei dinhmunah an la ding vek. April 25 hian League Cup final-ah Tottenham Hotspur an hmachhawn dawn a, tun Inrinni zan hian Jose Mourinho hote hi league-ah an mikhual dawn a, final enchhinna a tih theih ang.

FA Cup-ah Swansea hnehin quarterfinal an lut a, Premier League club ṭha dang Manchester United, Leicester City leh Everton te bakah nizan inkhela an chak chuan Chelsea te la hmachhawn thei bawk mah se Pep Guardiola hote hi an squad a chhah avangin champion rinkai an ni tho.

Premier League-ah Man City hi hmahruaitu an ni mek a, match 22 an khelh tawh aṭangin point 50 an hmu. An hnuai chiaha awm Man United aiin match khata an khel tlem chungin point ngain an sang zawk a, champion rinkai lawrlak an ni.

Champions League-ah Pep Guardiola-a'n harsatna a tawk ṭhin a, Barcelona a chhuahsan hnuah Bayern Munich hlawhtling takin enkawl mah se season thum chhungin vawi thum semifinal an lut a, final an thleng zo lo vek. 

Man City-ah pawh Pep-a hote hian beisei an pha chuang lo a, Champions League-ah an ṭangulh leh ṭhin. Pep-a hote hian last 16-ah German club Borussia Monchengladbach an hmachhawn dawn a, quarterfinal an luh theih mai beiseiawm mah se nomawi chawi erawh a harsa ang.